Hechos

26 Hänge nuga di nzoꞌähu̱ pa gi ntestigohu̱ nunä pa, ge nuga xä ntꞌaxigi de rä ji de gatꞌho yä jäꞌi, 27 ngeꞌä nuga hixtä tsaya de gä xiꞌähu̱ gatꞌho nuꞌu̱ yä tsꞌofo Äjuä. 28 Nsuse̱hu̱ ꞌne suhu̱ gatꞌho rä taxo, habu̱ go rä espiritu santo xä hñuxꞌäꞌihu̱ ngu yä superintendente, pa gi fadihu̱ rä mhuntsꞌi Äjuä, näꞌä bi dai ko rä ji rä Tꞌu̱se̱. 29 Di pädi ge mꞌe̱fa de gä ma, yä miñꞌo ma dä yu̱tꞌi entre geꞌähu̱ ꞌne hingä ma dä trata ko rä mhäte rä taxo, 30 ꞌne de entre geꞌähu̱, ma dä mꞌu̱pu̱ rꞌa yä ñꞌo̱ho̱ nuꞌu̱ ma dä mängä yä ntꞌudi hingä mäjuäni pa dä ꞌueke nuꞌu̱ yä gamfri ꞌne dä zitsꞌi kongeꞌu̱. 35 Pa gatꞌho, nuga xtä utꞌäꞌihu̱ ge xa mähyoni gi mpe̱fihu̱ pa gi faxu̱ nuꞌu̱ di japäbi mꞌe̱di, ꞌne pe̱ꞌtsi te gi benihu̱ nuya yä noya bi mää mä zi Hmuuhu̱ rä Hesu, nuꞌmu̱ bi ꞌñenä: “Mänꞌa ja rä johya ora di unihu̱ ke ora di hänihu̱”».