Éxodo
34 ꞌNepu̱ Jeoba bi ꞌñembäbi Moisés: «Hyoki yoho yä nxindo ja ngu nuꞌu̱ yä mu̱di, pa gä ofo nuꞌu̱ yä noya mi hutsꞌi ha nuꞌu̱ yä mu̱di nxindo, nuꞌu̱ gä tehmi. 2 ꞌNe ñhoki pa ri xudi, ngeꞌä ma gi po̱xä nꞌitꞌho ha rä tꞌo̱ho̱ Sinaí ꞌne ma gi mꞌai ndelante de geki, ha rä ndehe rä tꞌo̱ho̱. 3 Pe hinto dä za dä bo̱tsꞌe kongeꞌi, nixi hinto di ne gä handi di yꞌobu̱ ha gatꞌho rä tꞌo̱ho̱. ꞌNe nixi nꞌa rä taxo, nixi yä ndämfri hindi ne gä handi di yꞌobu̱ di ñuni mfrente de näꞌä rä tꞌo̱ho̱ꞌä». 4 Hänge Moisés bi hyoki yoho yä nxindo ngu nuꞌu̱ yä mu̱di, ꞌne bi nangi rä hyaxꞌä nꞌitꞌho ꞌne bi mu̱di bi bo̱xä ha rä tꞌo̱ho̱ Sinaí, ja ngu xki mändabi Jeoba, ꞌne mi hñä nuꞌu̱ yoho yä nxindo. 5 ꞌNepu̱ Jeoba bä käi ha nꞌa rä gui pa ja bä nthe̱uini ꞌne Jeoba bi mängä rä thuhu. 6 ꞌNe Jeoba bi thogi mfrente de geꞌä ꞌne mi mää: «Jeoba, Jeoba, nꞌa rä Zi Dada näꞌä ja rä nthekäte ꞌne rä hojäꞌi, hingä nguntꞌä di nkue̱ ꞌne xa rä däta rä mhäte ꞌne nzäntho o̱tꞌe näꞌä mää, 7 ꞌne umbäbi rä mhäte yä mꞌotho yä jäꞌi, ꞌne uni rä mpumbäte po yä error, pumbäbi nuꞌu̱ toꞌo di ꞌuengi de yä mhända ꞌne nuꞌu̱ toꞌo o̱tꞌe yä tsꞌoki kontra geꞌä. Pe hingi tsoogi nsi rä kastigo nuꞌu̱ di ho dä yꞌo̱tꞌe yä tsꞌoki, ꞌne po yä tsꞌoki yä dada, Näꞌä bi hämpäbi rä kastigo yä bätsi, yä ꞌme̱to, asta rä hñuu rä generación ꞌne rä goho rä generación». 8 Nubye̱, Moisés nguntꞌä bi ndandiñähmu. 9 ꞌNepu̱ bi ꞌñembäbi: «Mu̱ nubye̱ gi numäñhogi, oh Jeoba, nuꞌmu̱, po rä mäte Jeoba, gi ma mädetho de gekhe, mäske nuje xa hindi o̱he näꞌä gi mändagihe, ꞌne punꞌgägihe mä errorhe ꞌne mä tsꞌokihe, ꞌne jaa ri me̱ti nunä hnini». 10 ꞌNe Näꞌä bi ꞌñembäbi: «Hyandi, nubye̱ di ja nꞌa rä kohi: Ante yä da gatꞌho ri hnini, nuga ma gä hoki yä tꞌo̱tꞌe xa tsꞌu̱ngänza ngu nuꞌu̱ nunka toꞌo xä hyoki ha gatꞌho rä xiꞌmhai o entre gatꞌho yä dähni; ꞌne gatꞌho rä hnini habu̱ gi ꞌmu̱i ma dä hyandi rä ꞌme̱fi Jeoba, ngeꞌä xi xä nsunda näꞌä rä tꞌo̱tꞌe di ja kongeꞌi. 11 »Hänge nuꞌi, jamäsu näꞌä di mändaꞌi nubye̱. ¡Hyandi!, Nuga di kui ndelante de geꞌi nuꞌu̱ yä amorreo ꞌne yä cananeo ꞌne yä hitita ꞌne yä perizita ꞌne yä heveo ꞌne yä jebuseo. 12 Jamäsu pa hingi ja nꞌa rä kohi ko nuꞌu̱ yä mengu de nuꞌu̱ yä hai habu̱ gri ma, pa njabu̱ hindä zo̱ho̱ dä nja ngu nꞌa rä xägu pa geꞌi. 13 Pe nuꞌähu̱ pe̱ꞌtsi te gi tämihu̱ nuꞌu̱ yä altar, ꞌne gi xutꞌihu̱ nuꞌu̱ yä columna di xo̱kämbeni, ꞌne gi tse̱kihu̱ nuꞌu̱ yä poste di ndäne. 14 Nuꞌi hingi debe gi ndäne mä nꞌa rä zidada, ngeꞌä fädi ge Jeoba näꞌä adi ge ho̱nseꞌä drä ndäne. Hää, näꞌä nꞌa rä Zi Dada näꞌä adi ge ho̱nse̱ꞌä drä so̱kämbeni.