Tito

5 Nuga dä tsokꞌäꞌi ha Creta pa gi korregi nuꞌu̱ yä tꞌo̱tꞌe hinxä ñho, ꞌne pa gi hñutsꞌi yä ansiano po gatꞌho yä hnini, ja ngu dä xiꞌäꞌi: 6 nꞌa rä anciano hindi debe dä nja de te drä akusabi, dä me̱ꞌtsi nꞌadä rä ꞌme̱hñä, dyä gamfri nuꞌu̱ yä bätsi ꞌne hinte mä raso ma dä uni pa dä tꞌenä ge nuꞌu̱ yä mäñä ꞌne yä tsꞌogäyꞌo̱de. 7 Ngeꞌä näꞌä rä ꞌme̱go toꞌo Äjuä pe̱ꞌspäbi rä komfiansa hindi debe dä nja de te drä akusabi, hindi debe drä terco nixi mäntꞌä di nkue̱, hingä drä tixfani nixi hingä drä bo̱ka nixi drä mu̱nte. Hindi debe dä ñꞌambisioso nixi dä ñhate kontal te dä dähä. 8 Sino ke debe di pädi dä ungä ntsaya, dä mädi näꞌä xä ñho, dä nja rä juisio ꞌne hindä ꞌuege de yä mhända Äjuä, ꞌne dä bädi dä dominä rä mfeni. 9 Debe dä me̱fi ja ngu mängä rä Noya Äjuä ora umbä yä tsꞌofo ꞌne uti märꞌaa, pa njabu̱ dä za dä nupäbi yä mfeni märꞌaa ko nuꞌu̱ yä ntꞌudi faxte ꞌne dä korreji nuꞌu̱ di nkontraui rä Noya Äjuä.