Génesis

3 Nubye̱, de gatꞌho nuꞌu̱ yä zuꞌue xki hyoki rä Zi Dada Jeoba, rä kꞌeñä geꞌä mänꞌa xa mi pädi dä ñhate. Näꞌä bi yꞌambäbi näꞌä rä ꞌme̱hñä: «¿Xa mäjuäni bi xiꞌähu̱ Äjuä ge hingi debe gi tsiphu̱ yä fruta de gatꞌho nuꞌu̱ yä arbol ja ha rä jardin?». 2 Näꞌä ꞌme̱hñä bi ꞌñembäbi näꞌä kꞌeñä: «Dä za gä tsihe gatꞌho nuꞌu̱ yä fruta ja ha rä jardin. 3 Pe de näꞌä rä arbol ꞌmai mädetho de rä jardin, Äjuä xä ꞌñenä: “Hindi debe gi tsipäbihu̱ yä fruta, hinä, hindi debe gi thathu̱. Mu̱ gi tsihu̱, ma gi tuhu̱”». 4 Nubye̱, näꞌä rä kꞌeñä bi ꞌñembäbi näꞌä ꞌme̱hñä: «Hingä mäjuäni ma gi tuhu̱. 5 Äjuä pädi xä ñho ge näꞌä rä pa gi tsihu̱ de geꞌä, geꞌä rä pa ma dä xogi ri dahu̱ ꞌne ma gi njahu̱ ngu Äjuä: ma gi pädihu̱ näꞌä xä ñho ꞌne näꞌä xä ntsꞌo». 6 Nubye̱ näꞌä rä ꞌme̱hñä bi mu̱di bi nu̱ꞌti näꞌä rä arbol ꞌne bi hyandi ge mi xä ñho pa toꞌo dä zi ꞌne mi nheki mähotho. Hää, näꞌä arbol xa mi mähotho. Hänge näꞌä rä ꞌme̱hñä bi du̱ki näꞌä fruta ꞌne bi zi. Mꞌe̱fa, ꞌnehe bi umbi rä däme nuꞌmu̱ bi nthe̱ui ꞌne näꞌä bi mu̱di bi zi ꞌnehe. 15 ꞌNe nuga ma gä japi dä nja rä ntꞌu̱tsate entre nuꞌi ꞌne näꞌä rä ꞌme̱hñä, ꞌne entre nuꞌu̱ ri bätsi ꞌne rä bätsiꞌä. Näꞌä ma dä netꞌäꞌi ri ñäxu, ha nuꞌi ma gi u̱mbäbi rä du̱ngua». 19 Ko ri nxanthe ma gi hyoni näꞌä ma gi tsi asta xki pengi ha rä hai, ngeꞌä de gehni xki ꞌñehe. Ngeꞌä nuꞌi grä fonthai ꞌne ma gi pengi ha rä fonthai».