Isaías

11 Pe nuꞌähu̱ gi ꞌmu̱ihu̱ entre nuꞌu̱ tsopu̱ Jeoba, entre nuꞌu̱ pumfri mä mäkä tꞌo̱ho̱, entre nuꞌu̱ hoki nꞌa rä mexa pa näꞌä zidada de rä Hogä Suerte, ꞌne entre nuꞌu̱ di ñuꞌtsi yä kopa ko rä nthäntsꞌä binu pa näꞌä rä zidada de rä Destino. 13 Hänge gehnä mängä rä Zi Dada Jeoba: «¡Hyanthu̱! Nuꞌu̱ mä ꞌme̱go ma dä ñuni xä ñho, pe nuꞌähu̱ ma gi thogihu̱ rä thuhu. ¡Hyanthu̱! Nuꞌu̱ mä ꞌme̱go ma dä ntsithe xä ñho, pe nuꞌähu̱ ma gi thogihu̱ rä nduthe. ¡Hyanthu̱! Nuꞌu̱ mä ꞌme̱go xa ma dä johya, pe nuꞌähu̱ ma gi thogihu̱ rä mꞌe̱ꞌtsa. 14 ¡Hyanthu̱! Nuꞌu̱ mä ꞌme̱go xa ma dä mafi ko rä johya ngeꞌä tsamäñho yä koraso, pe nuꞌähu̱ ma gi mafihu̱ po näꞌä rä u̱gi ma gi sentihu̱ ha ri korasohu̱ ꞌne ma gi nzonihu̱ ko rä dumu̱i. 16 ꞌne toꞌo ne dä hñäni nꞌa rä jäpi ha rä xiꞌmhai, ma dä hñäni rä jäpi de näꞌä rä Zi Dada mängä näꞌä mäjuäni ꞌne nunka faya. ꞌNe toꞌo di ja nꞌa rä promesa ꞌne di hura, ma dä promete ꞌne ma dä hura po rä thuhu näꞌä rä Zi Dada mängä näꞌä mäjuäni ꞌne nunka faya. Ngeꞌä nuꞌu̱ yä sufrimiento mi ja mä mꞌe̱tꞌo ya hinto ma dä beni. ꞌNe mä da, ya hinte mä dumu̱i ma dä hyandi. 17 Ngeꞌä ¡hyanthu̱!, nuga di hoki mä rꞌayꞌo mähetsꞌi ꞌne nꞌa rä rꞌayꞌo xiꞌmhai; ꞌne nuꞌu̱ yä tꞌo̱tꞌe mi ja mä mꞌe̱tꞌo ya hingä ma dä ehe ha ri mfenihu̱, nixi ma dä bo̱xä ha ri korasohu̱. 18 Hänge xa dä johyahu̱ pa nzäntho po näꞌä di hoki. Ngeꞌä, ¡hyanthu̱!, di hoki mänꞌaki xa mähotho Jerusalén ꞌne rä hnini. Di hoki xa mähotho ꞌne asta uni rä johya toꞌo handi. 19 ꞌNe xa ma gä johya po Jerusalén ꞌne xa ma gä johya po mä hnini. ꞌNe ha mä hnini ya hingä ma dä ntꞌo̱de yä tsꞌoni nixi yä mhafi de gä u̱gi». 20 «Ha gehni, yä ꞌue̱ne gatꞌho ma dä te, ꞌne yä jäꞌi ya hingä ma dä nxita. Ngeꞌä toꞌo dä du di pe̱ꞌtsi nꞌa nthebe nje̱ya ma dä nheki ngu nꞌa rä bäsjäꞌi, ꞌne näꞌä rä yꞌo̱tꞌä tsꞌoki ma dä zo̱päbi rä kastigo, mäske di pe̱ꞌtsi nꞌa nthebe nje̱ya. 21 ꞌNe nuꞌu̱ ma dä hyoki yä nguu pa go dä mꞌu̱hniꞌu̱; ꞌne nuꞌu̱ ma dä gätsꞌi yä obxi ꞌne dä zipäbi yä fruta. 22 Nuꞌu̱ hingä ma dä hyoki yä nguu pa go dä mꞌu̱i märꞌaa; nuꞌu̱ hingä ma dä mpotꞌi pa go dä zi märꞌaa. Ngeꞌä ja ngu yä ndunthi yä pa pe̱ꞌtsi nꞌa rä arbol, njabu̱ yä ndunthi yä pa ma dä me̱ꞌtsi mä hnini; ꞌne nuꞌu̱ mä ꞌme̱go xtä huahni xa ma dä johya po gatꞌho näꞌä ma dä me̱fi. 23 Nuꞌu̱ hingä ma dä nzabitho nixi ma dä ꞌme̱tä yä tsꞌe̱di, hingä ma dä me̱ꞌtsi yä bätsi pa dä sufri, ngeꞌä nuꞌu̱ ꞌne yä bätsi, go geꞌu̱ xä jäpi rä Zi Dada Jeoba. 24 Änte dä yꞌakägi rä mfatsꞌi, nuga ma gä thädi; mientra nuꞌu̱ tobe di ñä, nuga ma gä o̱de. 25 Rä miñꞌo ꞌne rä tꞌu̱kä de̱ti ma dä ñuni mähye̱gi, ꞌne rä zate ma dä zi yä tꞌe̱i ngu rä doro, ꞌne rä kꞌeñä ma dä zi rä hai. Ya hinte mä dañu ma dä yꞌo̱tꞌe ha mä mäkä tꞌo̱ho̱», njabu̱ enä Jeoba.