Apocalipsis

14 ꞌNepu̱ dä handä rä Tꞌu̱kä De̱ti mi ꞌmai ha rä tꞌo̱ho̱ Sion, ꞌne kongeꞌä mi ꞌmahui 144.000, ꞌne ha yä de mi hutsꞌi rä thuhuꞌä ꞌne rä thuhu rä Dada. 2 Dä o̱de nꞌa rä ruido näꞌä mi ehe de mähetsꞌi, ꞌñenä ora di ñhahni nꞌa rä däta tanthe ꞌne bi ntꞌo̱de ngu nꞌa rä däta ngani de gä hue̱i. ꞌNe näꞌä dä o̱de mi ngu nuꞌu̱ yä duhu pe̱i yä arpa. 3 Nuꞌu̱ mi tuhu ꞌne mi tuti näꞌä ꞌñenä nꞌa rä rꞌayꞌo thuhu ha thandi Äjuä habu̱ bi hudiꞌä, ꞌne ndelante de nuꞌu̱ goho yä e̱nxe̱ ja yä däta nsu, ꞌne ndelante de nuꞌu̱ yä anciano. ꞌNe hinto mi tsa dä bädi xä ñho näꞌä thuhuꞌä, ho̱nse̱ nuꞌu̱ 144.000 bi thai de ha rä xiꞌmhai. 4 Nuyu̱ gehyu̱ hinxä ntsꞌoni ko yä ꞌme̱hñä; ninꞌa rä ꞌme̱hñä hinxä ñꞌoui. Nuyu̱ gehyu̱ sigi de̱ni rä Tꞌu̱kä De̱ti hindi mporta habu̱ pa. Nuyu̱ gehyu̱ bi thai de ha rä xiꞌmhai ngu yä mu̱di fruta pa Äjuä ꞌne pa rä Tꞌu̱kä De̱ti, 6 ꞌNe dä handä mä nꞌa rä e̱nxe̱ mi ñhatsꞌi mädetho mähetsꞌi. Näꞌä mi hñä yä hogä notisia pa dä umbä ntꞌo̱de gatꞌho nuꞌu̱ ꞌmu̱i ha rä xiꞌmhai: pa gatꞌho yä dähni, yä tribu, yä idioma ꞌne yä pueblo.