Levítico

10 »”Mu̱ nꞌa rä jäꞌi de rä hnini Israel o nꞌa rä nzo̱ho̱ näꞌä ꞌmu̱i entre geꞌähu̱ tsi rä ji, nuga ma gä mfretaꞌme näꞌä toꞌo tsi rä ji, ꞌne ma gä häki de näꞌä rä hnini habu̱ ꞌmu̱i. 11 Ngeꞌä rä te rä ngo̱, ja ha rä ji, ꞌne nugase̱ xtä huxä ha rä altar pa nuꞌähu̱, pa dä su̱ki ri pekadohu̱, ngeꞌä rä ji geꞌä di xu̱ki yä pekado po mädee de näꞌä rä te ja ha rä ji. 13 Mu̱ nꞌa rä israelita o nꞌa rä nzo̱ho̱ jäꞌi näꞌä ꞌmu̱i entre geꞌähu̱, dä gu̱ nꞌa rä mbängä zuꞌue o nꞌa rä tsꞌintsꞌu̱ näꞌä dä za dä tsꞌi, näꞌä pe̱ꞌtsi te dä näꞌmbäbi rä ji ꞌne dä goꞌmi ko rä fonthai. 14 Ngeꞌä rä ji, geꞌä rä te gatꞌho yä ngo̱, ngeꞌä ha rä ji, ja jani rä te. Hänge dä embäbi yä israelita: “Ogi tsiphu̱ rä ji de ninꞌa rä klase rä ngo̱, ngeꞌä rä ji, geꞌä rä te gatꞌho yä ngo̱. Hänge toꞌo dä zi, pe̱ꞌtsi te dä tho».