Mateo

7 Ora gi xatuäbi Äjuä, oxa gi thäꞌtätho näꞌä gi mää ja ngu di ja rꞌa yä jäꞌi, ngeꞌä nuꞌu̱ kamfri ge Äjuä ma dä yꞌo̱de mu̱ njatꞌä di thäꞌti yä sadi. 9 »Nuꞌähu̱ pe̱ꞌtsi te gi jahu̱ ri sadihu̱ njaua: »“Mä Dadaꞌihe gi ꞌmu̱i mähetsꞌi, hyopi drä nsunda ri thuhu. 10 Hyopi dä ehe ri Tsꞌu̱tꞌhui. Hyopi dä tꞌo̱tꞌe ri bolunta ngu mähetsꞌi, ꞌnehe ha rä xiꞌmhai. 11 Rꞌakägihe mä thuhmehe pa nunä rä pa; 12 ꞌne punꞌgägihe mä thaihe, ja ngu nuje ꞌnehe xtä pumbäbihe nuꞌu̱ toꞌo tukägihe. 13 ꞌNe oxki hopi gä tagihe ha yä tentasio, ñängägihe de rä Zithu”. 14 »Ngeꞌä mu̱ gi pumbäbihu̱ märꞌa ora di ofendeꞌihu̱, nuꞌmu̱ ri Dadahu̱ näꞌä bi ꞌmu̱i mähetsꞌi ma dä punꞌäꞌihu̱ ꞌnehe. 24 Hinto dä za dä mꞌe̱go pa yoho yä hmuu; ngeꞌä nꞌaa ma dä u̱tsa ꞌne mä nꞌaa go ma dä mädi, o nꞌaa ma dä gohui xä ñho ꞌne mä nꞌaa go ma dä fayabi. Nuꞌähu̱ hindä za gi mꞌe̱gohu̱ pa Äjuä ꞌne al mismo tiempo gi mꞌe̱gohu̱ pa yä Bojä ꞌne yä Ñho. 25 »Hänge di xiꞌähu̱: Ya ogi turimu̱ihu̱ po ri bidahu̱ de te mä gi tsihu̱, nixi ogi turimu̱ihu̱ po ri ndoyꞌohu̱ de te ma gi hyehu̱. ¿Hage hinge mänꞌa di muui ri tehu̱ ke rä ñhuni ꞌne ri ndoyꞌohu̱ ke nꞌa rä hee? 26 Xa dä hyandihu̱ xä ñho te thogi ko yä zi tsꞌintsꞌu̱. Nuyu̱ hingi mpotꞌi nixi di nxofo, nixi pe̱ꞌtsi yä tapanko, pe näꞌä ri Dadahu̱ bi ꞌmu̱i mähetsꞌi go di nkargo dä umbäbi te dä zi. ¿Hage hinge mänꞌa gi balehu̱ ke nuyu̱ yä zi tsꞌintsꞌu̱? 27 ¿Toꞌo de geꞌähu̱ ko gi turimu̱ihu̱, dä za gi japhu̱ dä dura mä nꞌa yu̱ni ri tehu̱? 28 ꞌNehe, ¿pa te gi turimu̱ihu̱ po te gi hye̱hu̱? Hyandihu̱ xä ñho te thogi ko nuꞌu̱ yä zi do̱ni ja ha rä campo. Nuyu̱ di te xa mähotho mäske hingi mpe̱fi nixi ꞌue̱di; 29 pe di xiꞌähu̱ ge nisiquiera rä rey Salomón ko gatꞌho näꞌä mi pe̱ꞌtsi, nunka bi za bi hñee ngu nuyu̱ yä zi do̱ni. 30 Mu̱ Äjuä hete njabu̱ nuꞌu̱ yä zi do̱ni ja ha rä campo, mäske nubye̱ xa mähotho ꞌne xudi dä tsꞌätꞌi, ¿hage hingo ma dä hyetꞌäꞌihu̱, ꞌñägamfri jäꞌihu̱? 31 Hänge nunka debe gi turimu̱ihu̱ ꞌne gi ꞌñeñhu̱: “¿Te ma gä tsihu̱?”, o “¿te ma gä ꞌme̱tꞌihu̱?”, o “¿te ma gä hehu̱?”. 32 Ngeꞌä nuꞌu̱ yä jäꞌi hingi pädi Äjuä go geꞌu̱ xa tuyämu̱i po dä me̱ꞌtsi nuya yä kosa. Pe ri Dadahu̱ näꞌä bi ꞌmu̱i mähetsꞌi, pädi xä ñho ge di jaꞌähu̱ mꞌe̱di gatꞌho nuya yä kosa. 33 »Hänge sigi gi hyoñhu̱ mꞌe̱tꞌo rä Tsꞌu̱tꞌhui Äjuä ꞌne rä justisia, ꞌne gatꞌho nuya märꞌa yä kosa ma dä tꞌaꞌähu̱ ꞌnehe. 34 Hänge nunka debe gi turimu̱ihu̱ de te ma dä thogi ri xudi, ngeꞌä ri xudi ma dä ꞌñepu̱ ko yä dumu̱ise̱. Ya kada nꞌa rä pa pe̱ꞌtsäse̱ yä xuñha.