Éxodo

3 Moisés mi fatuäbi yä taxo rä ndo̱hñä, näꞌä rä majhä de Madián mrä thuhu Jetró. Nꞌa rä pa, mientra mi yꞌe̱tꞌä yä taxo ha rä lado yu̱hyadi de rä ꞌmatha, bi zo̱ni ha Horeb, näꞌä rä tꞌo̱ho̱ Äjuä. 2 Oraꞌä bi nheki nꞌa rä faspi mädetho de nꞌa xaxhni ꞌne bi nheki nꞌa rä e̱nxe̱ Jeoba. Moisés bi hyandi ge näꞌä tsibi xa mi zo̱o̱ pe himi tsätꞌi näꞌä xaxhni. 3 Hänge Moisés bi ꞌñense̱: «Ma gä joni pa gä handi xä ñho te rä me̱hni ꞌne por hanja hingi tsätꞌi nuni xaxhni». 4 Jeoba bi hyandi ge Moisés yꞌo mri joni. Oraꞌä bi zofo Moisés dende näꞌä xaxhni ꞌne bi ꞌñembäbi: «¡Moisés! ¡Moisés!». ꞌNe Moisés bi dädi: «Xi di ꞌmakua». 5 ꞌNepu̱ Äjuä bi ꞌñembäbi: «Ogi joni. Kꞌoti ri thiza, ngeꞌä näꞌä rä hai habu̱ gi netꞌi xä nsunda». 6 ꞌNe bi ꞌñembäbi: «Nugi go geki rä Äjuä ri dada, rä Äjuä Abrahán, rä Äjuä Isaac ꞌne rä Äjuä Jacob». Oraꞌä Moisés bi goꞌmi rä hmi ngeꞌä mi tsu dä hyandä Äjuä. 7 Jeoba ꞌnehe bi ꞌñenä: «Xtä handi hängu di sufri mä hnini ha Egipto ꞌne xtä o̱de hanja däntsꞌi ꞌne adi rä mfatsꞌi. Di pädi xä ñho te mä sufrimiento thogiꞌu̱. 8 Hänge ma gä käi pa gä ju̱ki de Egipto ꞌne pa gä japi dä bo̱tsꞌe mä hnini ha nꞌa rä hai xi rä däta ꞌne xa mähotho, ha nꞌa rä hai habu̱ po̱ho̱ rä tꞌafi ꞌne rä ꞌma, ha nuꞌu̱ yä hai yä cananeo, yä hitita, yä amorreo, yä perizita, yä heveo ꞌne yä jebuseo. 9 ¡Nubye̱ hyandi! Asta nuua xä zo̱kägi yä keha mä hnini Israel. ꞌNehe xtä handi hanja yä egipcio xa di maltrata ꞌne di kastiga mä hnini. 10 Nubye̱ guä ekua, ma gä pe̱ñꞌäꞌi uä nu rä faraón. Nuꞌi go ma gi ju̱ki de Egipto mä hnini Israel». 14 Hänge Äjuä bi ꞌñembäbi Moisés: «Nuga ma Gä tso̱ho̱ Gä nja näꞌä go Gä Desidi gä Nja». ꞌNepu̱ bi ꞌñembäbi: «Gehnä ma gi xipäbi yä me Israel: “Nuga ma Gä tso̱ho̱ Gä nja, bä pe̱nkägi kongeꞌähu̱”».