Génesis

49 ꞌNepu̱ rä Jacob bi zohnä gatꞌho yä tꞌu̱, ꞌne bi ꞌñembäbi: «Guä ehu̱ ꞌne muntsꞌihu̱ kongeki pa gä xiꞌähu̱ näꞌä ma gi thogihu̱ nuꞌu̱ yä pa xä ꞌñepu̱. 2 Nuga go geki Jacob, ꞌne nuꞌäꞌihu̱ go geꞌähu̱ mä tꞌu̱ꞌihu̱. Muntsꞌihu̱ ꞌne yꞌo̱dehu̱ nunä ma gä xiꞌähu̱. Nuga go geki ri dadahu̱ Israel. 3 «Rubén, nuꞌi go geꞌi mä mu̱di tꞌu̱ꞌi, mä nzaki ꞌne go geꞌi mä mu̱di bätsi dä pe̱ꞌtsi nuꞌmu̱ mi ja mä tsꞌe̱di. Nuꞌi go mänꞌa mi jahmä ri nsu ꞌne ri tsꞌe̱di. 4 Pe nubye̱, nuꞌi hinte mä däta nsu ma gi pe̱ꞌtsi, ngeꞌä gä porta ngu nꞌa rä däta nzo̱tꞌhe näꞌä hinto tsa dä daki, ꞌne gä po̱tsꞌe ha rä fidi ri dada. Näꞌä rä paꞌä, gä ꞌme̱tuäbi rä tꞌekꞌei mä fidi ngeꞌä gä mꞌe̱ngui rä ꞌme̱hñä ri dada. 5 »Simeón ꞌne Leví di nku. Nuyu̱ di usa yä majuai pa dä ñhote. 6 Nuga hindi ne gä ntsixmeyu̱. Nuga hindi ne gä ku̱tꞌi ko nuꞌu̱ di muntsꞌiui. Ngeꞌä nuꞌmu̱ xa bi nkue̱, bi hyo yä ñꞌo̱ho̱ ꞌne asta bi hye̱kuäbi yä ua yä ndämfri pa bi doua. 7 Dä zu̱di näꞌä xä ntso nuꞌu̱ yä kue̱, ngeꞌä geꞌä bi japi bi ñhote ꞌne himbi nja yä nhuekäte. Ma gä jaꞌähu̱ gi nxanihu̱ po gatꞌho rä dähni Israel. 8 » Nuꞌi Judá, nuꞌu̱ ri ku ma dä ꞌñetsꞌä ri nsu. Ko nuꞌu̱ ri yꞌe̱ ma gi miꞌtuäbi yä yꞌu̱ga nuꞌu̱ ri nkontra. Nuꞌu̱ märꞌa yä tꞌu̱ ri dada ma dä ndoki ante geꞌi. 9 Judá ꞌñenä ngu nꞌa rä zi tꞌu̱kä zate. Nuꞌi, zi iho, —de näꞌä ma gi ju̱u̱ pa gi tsi— dende gehni ma gi po̱tsꞌe pa guä ehe. Ngu nꞌa rä zate, näꞌä xä mꞌe̱ni ꞌne xä ju̱i. ¿Toꞌo ma dä ne dä xaxi mu̱ ähä? 10 Näꞌä rä tsꞌu̱tꞌo de gä rey hingä ma dä ꞌuege de Judá, nixi näꞌä rä bordo de gä mhända juatsꞌi ha yä ua hingä ma dä ꞌuege, asta sti zo̱ho̱ Siló, ꞌne gatꞌho yä hnini go gehni ri ꞌñepäbi dä yꞌo̱te. 13 «Zabulón ma dä mꞌu̱i ha rä hyo rä ndehe habu̱ tso̱ni yä barko. ꞌNe näꞌä rä hai di tokabi, ma dä tso̱ni getbu̱ de habu̱ kohi Sidón. 14 » Isacar näꞌä xa ja rä tsꞌe̱di ngu nꞌa rä zi burru ꞌne yä ndoyꞌo xa xä mee, ꞌne asta nuꞌmu̱ ꞌme̱ni pa di ntsaya, hingi fo̱te näꞌä xä thuti. 15 » Isacar ma dä hyandi ge näꞌä rä hai bi tꞌumbäbi xa mähotho pa toꞌo dä ntsaya ꞌne xä ñho pa toꞌo dä mpotꞌi. Näꞌä ma dä uni rä xiꞌnxi pa te dä thuti ꞌne xa ma dä mpe̱fi ntsꞌe̱di. 17 Dan ꞌñenä ngu nꞌa rä kꞌeñä näꞌä ꞌmo̱ngä ha rä ꞌñuu. Ma dä nja ngu nꞌa rä kꞌeñä näꞌä to̱ yä ndäni ꞌne ꞌmo̱ngä ha rä hyo rä ꞌñuu. Ora ma dä thogi nꞌa rä fani ma dä zapäbi yä ꞌmoho ꞌne ma dä japi dä dagi de gä xu̱tha näꞌä rä to̱ge. 18 Oh Zi Dada Jeoba, nuga ma gä to̱ꞌmi pa go gi ñängägihe. 19 «Rꞌa yä be ma dä yu̱tꞌi ha nuꞌu̱ yä hai rä Gad pa dä bepi, pe nuni hingä ma dä dehatho, sino ke ma dä no̱ꞌtuäbi ꞌne ma dä te̱tui. 20 »Aser ma dä me̱ꞌtsi ndunthi te dä zi ꞌne yä ꞌmotꞌi ma dä uni yä hogä sofo nuꞌu̱ asta ma dä za dä thäꞌtsuäbi rä rey. 21 »Neftalí näꞌä nꞌa rä zi fantho̱ xa mähotho ꞌne xa mähotho hanja ñä. 22 »José näꞌä geꞌä rä rꞌoho nꞌa rä arbol näꞌä xa di ungä rä fruta ꞌne ꞌmai ha rä hyo rä po̱tꞌhe, ꞌne yä yꞌe di ntu̱ngi asta de mäñä rä jädo. 23 Pe nuꞌu̱ yä yꞌe̱ngä lansa, xa bi u̱tsa José, ꞌne ko yä arko ꞌne yä lansa bi kꞌahni ꞌne xa bi sigi bi u̱tsa. 24 Pe po ränge näꞌä xa ja rä tsꞌe̱di ꞌne bi matsꞌi Jacob, näꞌä rä arko José himbi ꞌuagi ꞌne xa bi ze̱ti, ꞌne nuꞌu̱ yä yꞌe̱ xa mi tihi ꞌne xa mi tse̱di. Hää, po rä yꞌe̱ näꞌä rä mayꞌo ꞌne rä däta ndo̱do de Israel. 26 Nuꞌu̱ yä jäpi bi uni ri dada mänꞌa ma dä ndunthi ke nuꞌu̱ yä jäpi uni nuꞌu̱ yä tꞌo̱ho̱ di dura pa nzäntho ꞌne mänꞌa mä dä ndunthi ke nuꞌu̱ yä hogä tꞌo̱tꞌe uni nuꞌu̱ yä loma nzäntho xä nja. Nuꞌu̱ yä jäpi ma dä sigi ha rä ñäxu José, ha rä ndehe näꞌä toꞌo xä thahni de gatꞌho nuꞌu̱ yä ku. 27 «Ja ngu nꞌa rä lobo tu̱ni näꞌä rä zuꞌue xä gu̱u̱, Benjamín ma dä tu̱ni nuꞌu̱ yä nkontra. De di xudi ma dä zi näꞌä xä gu̱u̱, ꞌne de di ndee ma dä heke näꞌä xä gu̱u̱ pa dä umbäbi märꞌaa. 28 Gatꞌho geꞌu̱ bi zo̱ho̱ bi fädi ngu 12 yä tribu o familia nuꞌu̱ bi mꞌu̱i ha Israel, ꞌne gehnä bi xipäbi rä dada nuꞌmu̱ bi jäpi ꞌne bi umbäbi kada nꞌa de geꞌu̱ näꞌä mi tokabi.