Juan

36 Rä Hesu bi dädi: «Mä Tsꞌu̱tꞌhui hingä de nunä rä xiꞌmhai. Mu̱ mä Tsꞌu̱tꞌhui di gehmä de nunä xiꞌmhai, nuꞌmu̱ nuꞌu̱ mä maxte xä ntuhnihmä po geki pa njabu̱ hinxä tꞌe̱nkꞌägi ha yä yꞌe̱ yä judío. Pe mä Tsꞌu̱tꞌhui hingä de gekua». 37 Hänge Pilato bi ꞌñembäbi: «¿Gi enä ge nuꞌi grä rey?». Rä Hesu bi dädi: «Hää, nuꞌise̱ gi mää ge drä rey. Pa geꞌä xtä mꞌu̱i ꞌne pa geꞌä xtä ehe ha rä xiꞌmhai: pa gä udi näꞌä mäjuäni. Gatꞌho nuꞌu̱ di apoya näꞌä mäjuäni geꞌu̱ o̱de näꞌä di mää».