Isaías

2 Ha nuꞌu̱ yä gäxä pa, näꞌä tꞌo̱ho̱ de rä ngu Jeoba ma dä zo̱ho̱ dä mꞌai xä ñho mäñä de entre gatꞌho yä tꞌo̱ho̱, ꞌne ma dä nju̱tsꞌi de entre gatꞌho yä lomä, ꞌne ja gehni ma dä bo̱tsꞌe yä jäꞌi de gatꞌho yä dähni. 3 ꞌNe ndunthi yä hnini ja di mani ꞌne dä ꞌñenä: «Guä ehu̱, ma gä po̱xu̱ ha rä tꞌo̱ho̱ Jeoba, ha rä ngu näꞌä rä Äjuä Jakob. Näꞌä ma dä ꞌñutkägihu̱ de yä ꞌñuu, ꞌne nuju̱ ma gä de̱nihu̱». Ngeꞌä de Sion ma dä bo̱ni rä ley, ꞌne de Jerusalén ma dä bo̱ni rä noya Jeoba. 4 Näꞌä ma dä yꞌo̱tꞌe rä juisio entre gatꞌho yä dähni ꞌne ma dä juäni nuꞌu̱ yä asunto pe̱ꞌtsi ndunthi yä hnini. Nuꞌu̱ yä däjuai, kongeꞌu̱ ma dä hyoki yä tꞌabi, ꞌne nuꞌu̱ yä lansa kongeꞌu̱ ma dä hyoki yä tꞌe̱xi. Ya hingä ma dä gu̱tsꞌi yä däjuai yä dähni kontra märꞌa yä dähni, ngeꞌä nuꞌu̱ ya hingä ma dä bädi yä tuhni.