Hebreos

10 Ngeꞌä, näꞌä di mända rä Ley bi zo̱ho̱ bi nja ngu nꞌa rä xudi de nuꞌu̱ yä hogä tꞌo̱tꞌe ma xä ꞌñehe. Pe rä Ley hingä geꞌä ma dä gohi pa nzäntho, ngeꞌä nuꞌu̱ yä ofrenda di mända dä tꞌo̱tꞌe njatꞌä ꞌne ngu thogi kada nꞌa rä je̱ya, nunka ma dä za dä hñäki rä pekado. 2 Mu̱ dä lograhmä dä hñäki yä pekado nuꞌu̱ yä ofrenda di tꞌuni, ya hindä jahmä mꞌe̱di dä sigi dä tꞌuni yä ofrenda. Ngeꞌä nuꞌu̱ toꞌo di ja nunä mäkä ꞌme̱fi, ¿hage hingä kombasta nꞌa mꞌikitho dä uni nuya yä ofrenda pa dä gohi xä ntꞌaxi yä konsiensia? 3 Pe himbi njabu̱, ngeꞌä nuꞌu̱ yä ofrenda mi tꞌuni, ho̱nse̱ mi bembäbi njatꞌä nuꞌu̱ yä pekado ꞌne ngu mi thogi kada nꞌa rä je̱ya, 4 ngeꞌä näꞌä rä ji yä doro ꞌne yä kabra nunka ma dä za dä hñäki yä pekado. 10 Po näꞌä «boluntaꞌä» bri xu̱gägihu̱ po mäde de näꞌä rä ndoyꞌo bi uni Ñhesukristo, ngu nꞌadä rä ofrenda pa nzäntho. 12 Pe nunä ñꞌo̱ho̱, bi uni nꞌadä rä sacrificio pa nzäntho po mä pekadohu̱ ꞌne bä hudi ha rä ñꞌe̱i Äjuä, 24 ꞌNe ma gä ꞌmu̱ihu̱ al tanto nꞌa ngu mänꞌaa ꞌne ma gä nupä mfenihu̱ pa gä udihu̱ rä mhäte ꞌne gä pe̱fihu̱ yä hogä tꞌo̱tꞌe, 25 ꞌne hingä he̱gi de gä muntsꞌihu̱ ja ngu xä nzäi rꞌaa. Sino ma gä nupä mfenihu̱ nꞌa ngu mänꞌaa, mänꞌa nubye̱ di handihu̱ ge näꞌä rä pa ya xa mꞌu̱i getbu̱. 39 Nubye̱, nuju̱ hindi njahu̱ ngu nuꞌu̱ di ꞌuege ꞌne ri ma ha rä du, sino ke nuju̱ hää ja mä jamfrihu̱ ꞌne geꞌä ma dä ñäni mä tehu̱.