1 Pedro

8 Mäske nunka gä handihu̱, gi mädihu̱. Mäske nubye̱ hingi handihu̱, gi pe̱ꞌspäbihu̱ rä jamfri ꞌne otho yä noya pa gi mäñhu̱ hängu rä johya gi sentihu̱. 18 Ngeꞌä nuꞌähu̱ gi pädihu̱ ge hingä ko nuꞌu̱ yä tꞌo̱tꞌe di tsꞌoki o di deni —ngu rä oro ꞌne rä plata— konte bri jutꞌi pa gi kꞌotꞌihu̱ de näꞌä rä mꞌu̱i hinte di muui bi zokꞌähu̱ ri dadahu̱ ꞌne ri xitahu̱. 19 Sino ke bri jutꞌi ko näꞌä rä ji xa di muui, ja ngu rä ji nꞌa rä zi tꞌu̱kä de̱ti näꞌä hinte mä tsꞌoki di ñꞌoui. Hää, bri jutꞌi ko rä ji rä Kristo. 22 Nubye̱ xkä ntꞌaxkihu̱ ngeꞌä gi o̱tehu̱ rä Noya Äjuä ꞌne njabu̱ di nheki nꞌa rä mhäte de gä ku näꞌä hingä rä yohmi; xa dä mädihu̱ nꞌa ngu mänꞌaa ko ngatꞌho ri korasohu̱.