Efesios
3 Ogi pedehu̱ de yä nkꞌatꞌä jäꞌi, nixi yä ntsꞌu̱di ꞌne nixi nuꞌu̱ yä tsꞌo nkꞌatꞌi, ꞌne portahu̱ ngu nuꞌu̱ yä jäꞌi xä ntꞌaxi ante yä da Äjuä. 4 Ogi portahu̱ de gä mꞌe̱tsa jäꞌi, ogi ñähu̱ ngu nuꞌu̱ yä dondo jäꞌi, nixi ogi mäñhu̱ yä ñhädondo. Mänꞌa xä ñho gi umfu̱ njamädi Äjuä. 5 Ngeꞌä nuꞌähu̱ ya gi pädihu̱ xä ñho, ge nuꞌu̱ yä ꞌñätsa jäꞌi o̱tꞌe yä pekado ko yä ndoyꞌo, nuꞌu̱ yä yꞌo̱tꞌä tsꞌoki, nuꞌu̱ yä ambisioso jäꞌi, hingä ma dä mꞌu̱i ha rä Tsꞌu̱tꞌhui Äjuä ꞌne rä Kristo, ngeꞌä nuꞌu̱ yä jäꞌi pe̱fi nuꞌu̱ yä tsꞌo tꞌo̱tꞌeꞌu̱ ꞌñenä mähye̱githo ko nuꞌu̱ yä jäꞌi di xo̱kämbeni yä idolo. 6 Ogi hopäbihu̱ toꞌo dä hyaꞌähu̱ ko nuꞌu̱ yä noya hinte di bale, ngeꞌä po nuꞌu̱ yä tsꞌo tꞌo̱tꞌeꞌu̱ xä ꞌñepu̱ rä kue̱ Äjuä pa gatꞌho nuꞌu̱ yä tsꞌo yꞌo̱de. 7 Hänge nuꞌähu̱ ogi ntsixu̱ ko nuꞌu̱ pe̱fi nuya yä tsꞌoki; 8 ngeꞌä mä mꞌe̱tꞌo nuꞌähu̱ ngi yꞌohu̱ ha rä ꞌme̱xui. Pe nubye̱ gi yꞌohu̱ ha rä ñotꞌi mähye̱gi ko rä zi Hmuu. Sigi gi ꞌmu̱ihu̱ ngu yä bätsi rä ñotꞌi, 9 ngeꞌä toꞌo ꞌmu̱i ha rä ñotꞌi udi rä ñhojäꞌi, rä justisia ꞌne mängä näꞌä mäjuäni. 10 Sigi gi hyanthu̱ xä ñho ge näꞌä gi pe̱fihu̱ di numäñho rä zi Hmuu; 15 Hänge hyanthu̱ xä ñho näꞌä gi pe̱fihu̱ ꞌne ogi portahu̱ de gä dondo, sino ke ꞌñudihu̱ ge ja ri mfenihu̱, 16 ꞌne usahu̱ xä ñho ri tiempohu̱, ngeꞌä nuya yä pa xi xä ntsꞌo. 17 Po rängeꞌä ya ꞌñudihu̱ ge ja ri juisiohu̱, ꞌne ntiendehu̱ ndaꞌä rä bolunta Jeoba. 19 Nupämfenihu̱ nꞌa ngu mä nꞌaa ko yä salmo ꞌne yä jähñä, ntuhuhu̱ ko ngatꞌho ri korasohu̱ ꞌne pe̱ihu̱ yä ꞌmida pa rä Zi Dada Jeoba, 20 umbäbihu̱ njamädi Äjuä mä Dadahu̱ po gatꞌho näꞌä xä rꞌakägihu̱ ꞌne jahu̱ po rä thuhu mä zi Hmuuhu̱ Ñhesukristo. 22 Yä ꞌme̱hñä dä yꞌo̱te yä däme, ja ngu o̱te rä Hmuu, 23 ngeꞌä rä däme geꞌä rä ñäxu de rä ꞌme̱hñä, ja ngu rä Kristo geꞌä rä ñäxu de rä mhuntsꞌi, ꞌne geꞌä nꞌa rä ñänte de nunä ndoyꞌo. 25 Dämehu̱, sigi gi mädi ri ꞌme̱hñähu̱, ja ngu rä Kristo ꞌnehe bi mädi rä mhuntsꞌi ꞌne bi da rä te po geꞌä, 28 Njabu̱ ꞌnehe yä däme pe̱ꞌtsi te dä mädi yä ꞌme̱hñä ja ngu di mädi yä ndoyꞌose̱. Nꞌa rä ñꞌo̱ho̱ näꞌä di mädi rä ꞌme̱hñä, mädi rä ndoyꞌose̱, 29 ngetꞌho ninꞌa rä ñꞌo̱ho̱ hinxä u̱tsa rä ndoyꞌose̱, pe hää di ꞌuini ꞌne di mädi, ja ngu rä Kristo di mädi rä mhuntsꞌi, 33 Pe ꞌnehe, kada nꞌa de geꞌähu̱, pe̱ꞌtsi te dä mädi rä ꞌme̱hñä ja ngu di mädise̱. ꞌNehe, rä ꞌme̱hñä pe̱ꞌtsi te dä umbäbi rä tꞌekꞌei rä däme.