2 Corintios

9 Pe näꞌä bi ꞌñengägi: «Ya kombasta näꞌä rä mfatsꞌi di rꞌaꞌi, ngeꞌä mä tsꞌe̱di mänꞌa di nheki ora gi nguentꞌi». Hänge ko ndunthi rä johya di ñꞌetsꞌi ora otho mä tsꞌe̱di, pa njabu̱ näꞌä rä tsꞌe̱di rä Kristo dä sigi kongeke ngu nꞌa rä karpa habu̱ di ntaki. 10 Hänge di johya po nuya yä nguentꞌi di pe̱ꞌtsi, po nuꞌu̱ yä tsꞌone sikägi, po nuꞌu̱ yä xuñha ꞌne yä ntsꞌomꞌu̱i di thogi po ränge rä Kristo. Ngeꞌä ora di thogi yä nguentꞌi, geꞌmu̱ mänꞌa ja mä tsꞌe̱di.