Salmos

12 Ñängägi oh Jeoba, ngeꞌä ya bi thege nuꞌu̱ yä hojäꞌi; ya bi thege nuꞌu̱ yä jäꞌi mi o̱tꞌä ri bolunta. 2 Nꞌa ngu mä nꞌaa di ñhatꞌäse̱; di usa yä ne pa segun eꞌspäbi yä nsu märꞌaa, pe hingä mäjuäni geꞌä po̱ni ha yä koraso. 3 Jeoba ma dä hñäki gatꞌho nuꞌu̱ yä barbero ꞌne nuꞌu̱ chake eꞌspäbi yä nsu märꞌaa ho̱nse̱ ngeꞌä ne te dä hñäni, 4 nuꞌu̱ toꞌo enä: «Ko mä jänehu̱ ma gä ntätehu̱. Di usahu̱ mä nehu̱ ja ngu rꞌakägihu̱ mä ganähu̱: ¿Toꞌo go ma dä dominagihu̱?». 5 Rä Zi Dada Jeoba enä: «Ma gä mꞌai pa gä ñäni nuꞌu̱ yä jäꞌi dri japäbi dä sufri, ꞌne nuꞌu̱ yä zi hyoya däntsꞌi po nuꞌu̱ yä ntsꞌomꞌu̱i tꞌo̱ꞌtuäbi. Nuga mismo ma gä ñäni de nuꞌu̱ yä bo̱ka jäꞌi». 6 Yä noya rä Zi Dada Jeoba hinte mä tsꞌoki tu; ꞌñenä näꞌä rä plata xä tꞌe̱ntꞌä yoto mꞌiki ha nꞌa rä ornu de gä hai ꞌne xa xä tꞌaxki. 7 Oh Jeoba, go ma gi bijila nuꞌu̱; Nuꞌi go ma gi su ꞌne ma gi ñäni kada nꞌa de geꞌu̱ dende nunä rä tiempo ꞌne pa nzäntho. 8 Yä tsꞌomꞌu̱i jäꞌi yꞌo habu̱ go di umbä yä ganä ngeꞌä yä mexiꞌmhai ya hinte tsu ꞌne pe̱fi näꞌä xä ntsꞌo.