Lucas

15 Nubye̱ nuꞌu̱ yä jäꞌi kobra yä impuesto ꞌne nuꞌu̱ yä yꞌo̱tꞌä tsꞌoki, mi fahni rä Hesu pa dä yꞌo̱de näꞌä mi mää. 2 Tanto yä fariseo ngu yä escriba mi njontuäne ꞌne mi enä: «Nuni ñꞌo̱ho̱ di resibi ko rä johya yä yꞌo̱tꞌä tsꞌoki ꞌne asta di ñuni kongehyu̱». 3 Hänge rä Hesu bi hñuxä nunä ejemplo ꞌne bi ꞌñembäbiꞌu̱: 4 «Mu̱ nꞌa de geꞌähu̱ gi pe̱ꞌtsihu̱ 100 yä de̱ti ꞌne gi ꞌme̱dihu̱ nꞌaa, ¿hage hingi tsohu̱bu̱ nuꞌu̱ 99 ha rä mbonthi pa gi ma gi hyonihu̱ näꞌä xä mꞌe̱di asta xa gi tsu̱dihu̱? 5 ꞌNe ora gi tsu̱dihu̱, zäi ge ma gi yꞌe̱ntsꞌihu̱ ha ri xiꞌnxihu̱ ꞌne ma gi ndudehu̱ ko rä johya. 6 ꞌNe xki tso̱nihu̱ ha ri nguhu̱, zäi ge ma gi zohnihu̱ nuꞌu̱ ri amigohu̱ ꞌne nuꞌu̱ ri besinuhu̱ ꞌne ma gi ꞌñembäbihu̱: “¡Johyahu̱ kongeki, ngeꞌä ya dä tini näꞌä mä zi de̱ti xti ꞌme̱di!”. 7 Nuga di xiꞌähu̱ ge njabu̱ ꞌnehe; mänꞌa ma dä nja rä johya ha mähetsꞌi po nꞌa rä yꞌo̱tꞌä tsꞌoki näꞌä di arrepenti, ke po nuꞌu̱ 99 yä jäꞌi pe̱fi näꞌä xä ñho ꞌne hingi japäbi mꞌe̱di dä arrepenti. 8 »O xiꞌmu̱ nꞌa rä ꞌme̱hñä pe̱ꞌtsi rꞌe̱tꞌa yä moneda de gä dracma, ꞌne näꞌä dä ꞌme̱di nꞌa de geꞌu̱, ¿hingä ma dä tso̱ge rä ñotꞌi ꞌne dä mpaxi mbo rä nguu ꞌne dä hyoni rꞌamätsꞌu̱ asta xa dä dini? 9 ꞌNe ora xti dini, näꞌä nzofo yä amiga ꞌne yä besinä ꞌne embäbi: “Johyahu̱ kongeki, ngeꞌä ya dä tini näꞌä rä moneda de gä dracma xti ꞌme̱di”.