2 Tesalonicenses

2 ogi hopäbihu̱ toꞌo nguntꞌä dä komfundiꞌihu̱, nixi ogi hopäbihu̱ dä piꞌähu̱ nuꞌu̱ yä noya bi ehe de nꞌa rä espiritu, nixi nuꞌu̱ yä notisia gi o̱dehu̱ o gi hänihu̱ po mäde de nꞌa rä karta näꞌä según go xtä ofohe ꞌne xiꞌähu̱ ge ya bi zo̱ho̱ rä pa rä Zi Dada Jeoba. 6 ꞌNe nubye̱ nuꞌähu̱ gi pädihu̱ ndaꞌä näꞌä rä kosa sirbe ngu rä frenu, pa njabu̱ dä fädi toꞌoꞌä xti zo̱ho̱ rä tiempo. 7 Mäjuäni ge hingi fädi toꞌo näꞌä ntsꞌomꞌu̱i ya di mpe̱fi, pe ma dä njabu̱ asta nuꞌmu̱ näꞌä toꞌo sirbebye̱ ngu rä frenu, ya hindä goꞌtuäbi rä ꞌñuu. 8 Nuꞌmu̱ nubye̱ hää ma dä nheki toꞌo näꞌä nda tsꞌomꞌu̱i, pe rä Hesu näꞌä zi Hmuu ma dä huatiꞌä po mäde de näꞌä espiritu de rä ne, ꞌne ma dä huatiꞌä pa nzäntho xti nheki rä nsunda. 9 Pe näꞌä nda tsꞌomꞌu̱i di mpe̱fi ko rä mfatsꞌi rä Zithu ꞌne pe̱fi yä milagro ꞌne udi yä señä ꞌne yä däta tꞌo̱tꞌe pa dä ñhate, 10 ꞌne ma dä usa gatꞌho yä nthate pa dä kadi nuꞌu̱ yꞌo ri mꞌe̱di, ngeꞌä nuꞌu̱ himbi mädi näꞌä mäjuäni pa xä za xä ñäni yä te.