Salmos

23 Jeoba geꞌä mä Mayꞌo. Hinte ma dä mꞌe̱kägi. 2 Tsixkägi gä ntsaya habu̱ ja yä kꞌamä tꞌe̱i; tsixkägi gä ntsaya habu̱ ja ndunthi rä dehe. 3 Go geꞌä japi dä nja mä tsꞌe̱di mänꞌaki. Po ränge rä thuhu go Geꞌä gu̱nkägi ha näꞌä rä ꞌñuu habu̱ ja rä justisia. 4 Mäske di thogi ha nꞌa rä hñe habu̱ xa ja rä mꞌe̱xui, hinte di tsu ngeꞌä nuꞌi gi yꞌo kongeki; ri tsꞌu̱tꞌo ꞌne ri tsꞌu̱tꞌhui de gä Mayꞌo di sugägi pa hingä ntsu. 5 Ante yä da nuꞌu̱ di u̱tsagi, gi hokä nꞌa rä mexa pa gi rꞌakägi rä ñhuni. ꞌNe gi kotsꞌi rä aseite ha mä ñäxu pa dä xaha ꞌne xkä ñuꞌtsi mä kopa. 6 Di pädi ge rä ñhojäꞌi ꞌne näꞌä rä mhäte hingi faya, go geꞌu̱ ma dä kompañägi durante mä bida; po gatꞌho mä bida, ma gä mꞌu̱i ha rä ngu rä Zi Dada Jeoba.