Romanos

5 Hänge nubye̱ di pädihu̱ ge Äjuä xä borra mä thaihu̱ po näꞌä rä jamfri di pe̱ꞌspäbihu̱. Hänge ma gä johyahu̱ ngeꞌä po mädee de mä zi Hmuuhu̱ Ñhesukristo di ꞌmu̱ihu̱ en paz ko Äjuä. 2 ꞌNe po mädee de Ñhesukristo ꞌne po näꞌä mä jamfrihu̱, xä za xtä pe̱ꞌtsihu̱ nꞌa rä hogä ntsitsꞌi ko Äjuä ꞌne xa di johyahu̱ po geꞌä. ꞌNehe di johyahu̱ po näꞌä rä humu̱i di pe̱ꞌtsihu̱ de ke ma dä zo̱ho̱ rä pa habu̱ ma gä ꞌmu̱hu̱ ha rä nsunda Äjuä. 3 Es mäs, ma gä johyahu̱ ora di thogihu̱ yä xuñha, ngeꞌä di pädihu̱ ge yä xuñha di entrenägihu̱ pa gä uantahu̱. 4 ꞌNe ora di uantahu̱, Äjuä di numäñhogihu̱. ꞌNe mu̱ Äjuä di numäñhogihu̱, nuꞌmu̱ di pe̱ꞌtsihu̱ nꞌa rä humu̱i, 5 ꞌne näꞌä rä humu̱i hingä ma dä faya, ngeꞌä rä mhäte Äjuä xä nhäꞌmi ha mä korasohu̱ po mädee de näꞌä rä mäkä tsꞌe̱di xtä hänihu̱. 8 Pe Äjuä mꞌe̱tꞌo go bi ꞌñudi hängu rä mhäte pe̱ꞌtsi po gekhu̱, ngeꞌä mäske tobe ndyä pekadorhu̱, rä Kristo bi du po gekhu̱. 12 Hänge ho̱nse̱ ko nꞌadä rä ñꞌo̱ho̱, rä tsꞌoki bi yu̱tꞌi ha rä xiꞌmhai. Njabu̱ ko näꞌä rä tsꞌokiꞌä bi nja rä du. ꞋNe koꞌmu̱ gatꞌho yä jäꞌi bi mꞌu̱i ko rä tsꞌoki, hänge nubye̱ gatꞌho bi zu̱di rä du. 19 Ngeꞌä ja ngu ko ho̱nse̱ nꞌa rä ñꞌo̱ho̱ näꞌä himbi yꞌo̱de, ndunthi bi zo̱ho̱ bi me̱ꞌtsä rä pekado. Njabu̱ ꞌnehe, ko ho̱nse̱ nꞌa rä ñꞌo̱ho näꞌä bi yꞌo̱de, ndunthi ma dä zo̱ho̱ dä thandi ngu yä hojäꞌi.