Romanos

13 «Yä yꞌu̱ga xä xogi ngu nꞌa rä ntꞌagi näꞌä xä xotsꞌi; nuꞌu̱ xä usa yä jäne pa dä mängä yä nkꞌuamba». «Ha yä xine ja yä benenu yä kꞌeñä». 14 «ꞌNe ha yä ne xä ñutsꞌi ko yä tsꞌone ꞌne yä noya de gä kue̱». 15 «Yä ua xa di tihi pa dä fani yä ji». 16 «Habu̱ yꞌo huati gatꞌho ꞌne tsoogi rä ñhoya, 17 ꞌne nuꞌu̱ hinxä bädi te nguꞌä nꞌa rä mꞌu̱i temäꞌentho». 18 «Ndelante de yä da hinte mä ntsu pe̱ꞌspäbi Äjuä». 21 Pe nsi rä ley, rä justisia Äjuä xä nheki pa ko ngekhu̱ ja ngu mismo rä Ley mää ꞌne yä profeta. 23 Ngeꞌä gatꞌho xä yꞌo̱tꞌe rä tsꞌoki ꞌne hingi tsu̱di rä nsunda Äjuä, 24 ꞌne ngu nꞌa rä regalo näꞌä xä tꞌumbäbiꞌu̱ nuꞌmu̱ xä thandi ngu yä hojäꞌi, ngeꞌä Näꞌä xi rä dängi rä nhuekäte ꞌne xä ñäniꞌu̱ po mäde de näꞌä rescate bi uni rä Kristo Ñhesu. 25 Äjuä bi uni nꞌa rä mpo̱te nuꞌmu̱ bi ofrese rä Tꞌu̱ ngu nꞌa rä ofrenda, pa toꞌo dä me̱ꞌtsuäbi rä jamfri näꞌä rä ji bi fani, dä za dä me̱ꞌtsi mänꞌaki nꞌa rä hogä ntsitsꞌi ko Äjuä. Njabu̱ Äjuä bi ꞌñudi rä justisia ngeꞌä näꞌä bi me̱ꞌtsi ndunthi räpasensia ꞌne bi uni rä mpumbäte po nuꞌu̱ yä tsꞌoki de mäyaꞌmu̱. 28 Hänge di handihe ge Äjuä dä za dä numäñho nꞌa rä jäꞌi po näꞌä rä jamfri pe̱ꞌspäbi, ꞌne hingä ngeꞌä di ja nuꞌu̱ yä ꞌme̱fi mända rä ley.