Éxodo

32 Mientraꞌä, rä hnini bi hyandi ge Moisés tobe hingä mi pengitho de rä tꞌo̱ho̱. Oraꞌä gatꞌho yä jäꞌi bi fahni Aarón ꞌne bi ꞌñembäbi: «Mꞌai, ꞌne hyogägihe ꞌna rä zidada näꞌä dä ma ndelante de gekhe, ngeꞌä hindi pädihe te xpä thogi ko Moisés, näꞌä ñꞌo̱ho̱ bä jakägihu̱ dä po̱ñhu̱ de rä hai de Egipto». 2 Hänge Aarón bi ñꞌembäbiꞌu̱: «Yꞌapäbihu̱ nuꞌu̱ yä tsꞌu̱nꞌgu de gä oro to̱ge ha yä gu ri ꞌme̱hñähu̱, ri tꞌu̱hu̱ ꞌne ri tꞌixuhu̱, ꞌne guä hänkägihu̱ua». 3 Hänge gatꞌho rä hnini bi mu̱di bi hñäki yä tsꞌu̱nꞌgu de gä oro nuꞌu̱ mi to̱ge ha yä gu ꞌne bi hñätsuäbi Aarón. 4 ꞌNepu̱ näꞌä bi gu̱ näꞌä oro xki tꞌumbäbi, ꞌne bi gu̱ nꞌa rä cincel pa bi hyoki nꞌa rä tꞌu̱kä doro. ꞌNe nuꞌu̱ bi mu̱di bi ꞌñenä: «Gehnä ri Zi Dadahu̱, oh Israel, näꞌä bä ju̱kꞌäꞌihu̱ de rä hai de Egipto». 5 ꞌNe mi hyandi njabu̱ Aarón, bi mu̱di bi hyoki nꞌa rä altar ndelante de näꞌä tꞌu̱kä doro. ꞌNepu̱ Aarón bi ꞌñembäbiꞌu̱: «Xudi ma dä nja nꞌa rä ngo pa Jeoba». 6 Hänge rä hyaxꞌä nuꞌu̱ bi nangi nꞌitꞌho, ꞌne bi mu̱di bi tsätꞌi yä ofrenda ꞌne bi yꞌo̱tꞌe yä sacrificio de comunión. Mꞌe̱fa de geꞌä, gatꞌho rä hnini bi hñudi pa bi ñuni ꞌne bi ntsithe. ꞌNepu̱ nuꞌu̱ bi mꞌai pa bi diberti. 7 Nubye̱ Jeoba bi ꞌñembäbi Moisés: «Käi, ngeꞌä nuni rä hnini guä ju̱ki de Egipto, ya bi pe̱fi yä tsꞌoki. 8 ¡Nuyu̱ nguntꞌä bi ꞌuengi de näꞌä rä ꞌñuu dä mändabi dä ñꞌo! Nuyu̱ xä hyoki nꞌa rä tꞌu̱kä doro, ꞌne di ndäne ꞌne hokuäbi yä sacrificio ꞌne enä: “Gehnä ri Zi Dadahu̱, oh Israel, näꞌä bä ju̱kꞌäꞌihu̱ de rä hai de Egipto”». 9 ꞌNe Jeoba bi sigi bi ꞌñembäbi Moisés: «Nuga xtä handi ge nunä rä hnini xa hingi ne dä yꞌo̱de. 10 Hänge nubye̱, hyopkägi gä utuäbi toꞌogi ꞌne ko mä kue̱ mä gä huati gatꞌho, ꞌne en lugar de geꞌu̱ ma gä ja de geꞌi nꞌa rä däta hnini». 11 Pe Moisés bi bäntebi rä Zi Dada Jeoba ꞌne bi ꞌñembäbi: «¿Por hanja, oh Jeoba, ma gi ꞌñudi ri kue̱ kontra ri hnini mꞌe̱fa de guä ju̱ki de rä hai de Egipto, ꞌne guä udi hängu rä tsꞌe̱di ja ha ri yꞌe̱? 12 ¿Por hanja gi ne dä no̱ñꞌäꞌi yä me Egipto ꞌne da ꞌñenä de geꞌi: “Näꞌä bi ne bi gu̱ki de gekua rä hnini, ꞌne ho̱nse̱ pa bä ho ha yä tꞌo̱ho̱ ꞌne pa bi hñäkiꞌu̱ de nunä rä xiꞌmhai”? Dä kätꞌi ri kue̱ ꞌne po rä mäte paati ri mfeni ꞌne ote gi o̱tuäbi ri hnini. 13 Beni nuꞌu̱ ri ꞌme̱go Abrahán, Isaac ꞌne Israel ge gä prometebi ꞌne gä embäbi njaua: “Ma gä japi dä xu nuꞌu̱ ri bätsi, ma dä ndunthi ngu yä tso̱o̱ de mähetsꞌi, ꞌne ma gä umbäbiꞌu̱ näꞌä rä hai xtä huahni, pa ja dä mꞌu̱hniꞌu̱ pa nzäntho”». 14 ꞌNe Jeoba ya himbä hämpäbi rä hnini näꞌä kastigo mi mbeni dä hämpabi. 15 Moisés bi gäi de rä tꞌo̱ho̱, ꞌne mi hñä ha rä yꞌe̱ nuꞌu̱ yoho yä nxindo de rä Ley. Ha nuya yä nxindo xki tꞌofo po yo lado; xki tꞌofo tanto de nꞌa lado ja ngu de mä nꞌa lado. 16 Nuya yä nxindo go xki hyokise̱ Äjuä, ꞌne näꞌä mi hutsꞌi go xki yꞌofose̱ Äjuä ꞌne bi graba ha nuꞌu̱ yä nxindo. 17 Mi yꞌo̱de Josué yä mhafi rä hnini, näꞌä bi ꞌñembäbi Moisés: «Di ntꞌo̱de yä ruido de gä tuhni ha rä kampamento». 18 Pe Moisés bi dädi: «Pe näꞌä thuhu di ntꞌo̱de hingä geꞌä rä thuhu nuꞌmu̱ tähä nꞌa rä tuhni, nixi geꞌä rä thuhu nuꞌmu̱ ꞌme̱di nꞌa rä tuhni; nuga di o̱de ge näꞌä thuhu di nꞌañꞌo». 19 Ngu mi zo̱ni Moisés ha rä kampamento bi hyandi näꞌä tꞌu̱kä doro ꞌne nuꞌu̱ yä nhei mi ja. Moisés xa bi nkue̱ ꞌne bi päntsꞌi ha rä ua rä tꞌo̱ho̱ nuꞌu̱ yä nxindo mi hñä ꞌne bi dehmi. 20 Hänge nuꞌmu̱ Moisés bi gu̱ näꞌä rä tꞌu̱kä doro xki hyoki yä israelita ꞌne bi deni ko rä tsibi ꞌne bi gu̱ni asta xa bi mpolbo, ꞌme̱fa de geꞌä bi päntsꞌi ha rä dehe ꞌne bi japäbi yä israelita bi zi. 21 ꞌNepu̱ Moisés bi ꞌñembäbi Aarón: «¿Te bi yꞌo̱tꞌäꞌi nunä rä hnini pa gä hämpäbi nunä däta tsꞌoki?». 22 Nuꞌmu̱ Aarón bi dädi: «Ogi nkue̱ mä zi hmuu. Nuꞌi ya gi pädi ge nunä rä hnini di ho dä yꞌo̱tꞌe näꞌä xä ntsꞌo. 23 Hänge nuꞌu̱ bi ꞌñengägi: “Hyogägihe ꞌna rä zidada näꞌä dä ma ndelante de gekhe, ngeꞌä nuje hindi pädihe te xpä thogi ko Moisés, näꞌä ñꞌo̱ho̱ bä jakägihe dä po̱ñhe de rä hai de Egipto”. 24 ꞌNe nuga dä embäbiꞌu̱: “Toꞌo di hñäbu̱ rä oro dä hänkäua”. ꞌNepu̱ dä päntsꞌi näꞌä rä oroꞌä ha rä tsibi ꞌne bi bo̱ni nunä rä tꞌu̱kä doro». 25 ꞌNe Moisés bi hyandi ge rä hnini xa mi pe̱fi yä tsꞌo tꞌo̱tꞌe, ngeꞌä Aarón xki hyopi dä me̱fi njabu̱, ꞌne nuꞌu̱ mi nꞌa rä mꞌe̱tsa ante yä da nuꞌu̱ yä nkontra. 26 ꞌNepu̱ Moisés bi mꞌai ha näꞌä rä luga mi pe̱ꞌtsi ha rä goxthi rä kampamento ꞌne bi ꞌñenä: «¿Toꞌo ne dä de̱ni Jeoba? ¡Dä ehe kongeki!». Nubye̱ gatꞌho yä lebita bi joni kongeꞌä. 27 Nubye̱ näꞌä bi ñꞌembäbiꞌu̱: «Gehnä xä mängä Jeoba, näꞌä rä Zi Dada de Israel: “Kada nꞌa de geꞌähu̱ pe̱ꞌtsi te gi mfoxä ri majuaihu̱, ꞌne thogihu̱ po gatꞌho rä kampamento goxthi po goxthi ꞌne hyohu̱ ri kuhu̱, ri besinuhu̱ ꞌne nuꞌu̱ ri amigohu̱”». 28 Yä levita bi me̱fi ja ngu xki mända Moisés. Hänge näꞌä rä paꞌä bi tho ngu 3.000 yä ñꞌo̱ho̱. 29 ꞌNepu̱ Moisés bi ꞌñenä: «Nubye̱ ꞌmu̱hu̱ de rä lado Jeoba, ngeꞌä kada nꞌa de geꞌähu̱ xä kontraui rä tꞌu̱se̱ ꞌne rä kuse̱; nubye̱ Näꞌä ma dä rꞌaꞌähu̱ nꞌa rä jäpi». 30 ꞌNepu̱ rä hyaxꞌä, Moisés bi xipäbi rä hnini: «Nuꞌähu̱ xkä yꞌo̱tꞌehu̱ nꞌa rä däta tsꞌoki, ꞌne nubye̱ ma gä ma po̱xä ha rä tꞌo̱ho̱ ꞌne ma gä bäntebi rä Zi Dada Jeoba, pa njabu̱ xähmä dä punꞌäꞌihu̱ ri tsꞌokihu̱». 31 Nubye̱ Moisés bi mengi ha Jeoba ꞌne bi ꞌñembäbi: «¡Xi nꞌa rä däta tsꞌoki xä yꞌo̱tꞌe nunä rä hnini! ¡Nuyu̱ xä hyokse̱ pa geꞌu̱ nꞌa rä zidada de gä oro! 32 Pe nubye̱ xähmä gi ne gi pumbäbi yä tsꞌoki; mu̱ hinä, po rä mhäte borra mä thuhu de näꞌä ri libro habu̱ xkä ofo». 33 Pe Jeoba bi ꞌñembäbi rä Moisés: «Toꞌo xä yꞌo̱tꞌe yä tsꞌoki kontra geki, geꞌä ma gä borrabi rä thuhu de mä libro. 34 Nubye̱, ri ma ꞌne tsitsꞌi rä hnini habu̱ ya xtä xiꞌi. ¡Hyandi! Mä e̱nxe̱ ma dä ma ndelante de geꞌi, ꞌne ha näꞌä rä pa ma gä hämpä ngue̱nda, Nuga ma gä hämpäbi rä kastigo po nuꞌu̱ yä tsꞌoki». 35 ꞌNe Jeoba bi mu̱di bi me̱mpä yä plaga rä hnini ngeꞌä nuyu̱ xki hyoki nꞌa rä tꞌu̱kä doro, näꞌä xki hyoki Aarón.