Números

6 Jeoba bi sigi bi zofo Moisés ꞌne bi ꞌñembäbi: 2 «Ñäui yä israelita ꞌne ꞌñembäbi: “Mu̱ nꞌa rä ñꞌo̱ho̱ o nꞌa rä ꞌme̱hñä di prometebi Jeoba dä mꞌu̱i de gä nazareo, 3 hindi debe dä zi yä binu nixi märꞌa yä ithe. Hindi debe dä zi näꞌä rä binu ya xä mvinagre, nixi rä vinagre de märꞌa yä bebida. Hindi debe dä zi ninꞌa rä bebida näꞌä xä thoki ko yä obxi. Nixi hindi debe dä zi yä obxi nuꞌu̱ ja xä thu̱ki, nixi nuꞌu̱ ya xä mpasa. 4 Durante nuꞌu̱ yä pa ma dä mꞌu̱i de gä nazareo hindi debe dä zi ninꞌa rä ñhuni näꞌä xä thoki ko yä obxi, nixi nuꞌu̱ yä obxi hingi tätho, nixi nuꞌu̱ yä xifri yä obxi. 5 »”Durante nuꞌu̱ yä pa ma dä mꞌu̱i de gä nazareo hindi debe dä ñꞌäxi. Pe̱ꞌtsi te dä mꞌu̱i xä ntꞌaxi ꞌne dä hyopi dä te rä stää, asta xa dä kumpli nuꞌu̱ yä pa xä ñäꞌti Jeoba dä me̱päbi de gä nazareo. 6 Mientra dä me̱päbi Jeoba de gä nazareo, hindi debe dä uatꞌi nꞌa rä animä. 7 Mäske rä dada, rä nänä, rä ku o rä nju näꞌä toꞌo xä du, hindi debe dä uatꞌi pa hindä ntsꞌoni, po näꞌä rä seña hätsꞌi ha rä ñäxu de gä nazareo pa Äjuä. 8 »”Nunä jäꞌi pe̱ꞌtsi te dä mꞌu̱i xä ntꞌaxi pa Jeoba, durante näꞌä tiempo xä prometebi dä me̱päbi de gä nazareo.