Proverbios

7 ꞌne mientra ndi handi nuꞌu̱ hinte myä fädi, dä da ngue̱nda ge entre yä bäsjäꞌi, mi yꞌoni nꞌa rä dondo tsꞌu̱ntꞌu̱. 8 Näꞌä bi thogi ha rä skinä näꞌä calle habu̱ nzäntho mi ꞌmai näꞌä ꞌñätsa ꞌme̱hñä. ꞌNepu̱ bi gu̱ näꞌä rä ꞌñuu mi tsitsꞌi ha rä ngu näꞌä ꞌme̱hñäꞌä. 9 Rä Hyadi bi yu̱i, ꞌne bi mu̱di bi nxui. 10 ꞌNepu̱ dä handi hanja bä po̱ni nꞌa rä ꞌme̱hñä pa bä e bi zu̱di näꞌä tsꞌu̱ntꞌu̱. Näꞌä ꞌme̱hñä xki hñutsꞌi nuꞌu̱ yä dutu pa dä pa rä ndoyꞌo, ꞌne xa mi pädi hanja dä hyatꞌi yä ñꞌo̱ho̱. 11 Xa rä mase̱ näꞌä ꞌme̱hñä ꞌne hinte mä tsꞌofo o̱de. Nunka ꞌmu̱ ha rä nguu. 12 Nubye̱, bi bo̱ngä ha rä calle, bi mꞌahni nꞌa rato ꞌne mꞌe̱fa bi ma ha yä tai; kada dä tso̱ni ha nꞌa rä skinä, ꞌmahni nꞌa rato pa aki yä ñꞌo̱ho̱. 13 Mi hyandi näꞌä tsꞌu̱ntꞌu̱, bi pe̱ntꞌi ꞌne bi zu̱tsi, ꞌne nsi rä tsa embäbi: 14 «Nuga xti promete gä uni nꞌa rä ofrenda näꞌä udi nꞌa rä hogä ntsitsꞌi ko Äjuä. ꞌNe nunä pa ya dä jutꞌä mä promesa. 15 Po rängeꞌä dä po̱nibye̱ pa gä hoñꞌäꞌi, ꞌne xäꞌä xa dä nthe̱ui. 16 Ha mä kamä xtä kätsꞌi nuꞌu̱ yä hogä däxꞌo de gä linu xpä thä de Egipto, ꞌne xa mähotho nuꞌu̱ yä kolo. 17 Xtä kotsꞌi ha mä kamä yä perfume de gä mirra, de gä áloe ꞌne de gä canela. 18 Guä ekua, ma gä mädihu̱ asta dä hyatsꞌi; xa ma gä johyahu̱ ꞌne ma gä mädihu̱ asta dä zu̱ mä nkꞌatꞌihu̱. 19 Ha mä nguu di ꞌmu̱se̱, ngeꞌä mä däme xä bo̱ni yabu̱. 20 Bi hñäxä nꞌa murra rä bojä, ꞌne näꞌä ma duä pengi asta xti ñäxä rä zänä». 21 Näꞌä ꞌme̱hñä xa di rogabi näꞌä tsꞌu̱ntꞌu̱. Xa di tentabi ko nuꞌu̱ yä noya xipäbi. 22 Nubye̱, näꞌä tsꞌu̱ntꞌu̱ nguntꞌä di de̱ni näꞌä ꞌme̱hñä, di ꞌme̱fa ngu nꞌa rä doro näꞌä ri ma pa dä tho. Ngu nꞌa rä dondo näꞌä xa di nextꞌihi, pe hingä pädi ge ma drä kastiga ha nꞌa rä zaa. 23 Mi dämfri, nꞌa rä flecha bi su̱mbäbi rä yaa. ꞌÑenä nꞌa rä tsꞌintsꞌu̱ näꞌä bi dase̱ ha nꞌa rä trampa, ꞌne nixi hingi pädi ge ja gehni ma dä ꞌme̱di rä bida. 24 Hänge zi ihohu̱, yꞌo̱dehu̱; jamäsuhu̱ nuya yä noya di mää. 25 Ogi hopi ri koraso dä ꞌuengi pa dä ma ha rä ꞌñuu näꞌä ꞌme̱hñäꞌä. Oxki ma gi de̱ni ꞌne po rängeꞌä ma gi mꞌe̱di ꞌne ma gi yꞌobu̱ de gä nani. 26 Ngeꞌä näꞌä ꞌme̱hñäꞌä xä japi xä dagi ndunthi, ꞌne xi ndunthi nuꞌu̱ xä hyo. 27 Rä nguu tsitsꞌi directo ha rä Ntꞌagi; käi ha nuꞌu̱ yä ꞌme̱xui gä kuarto de rä du.