Éxodo

3 ꞌNepu̱ Moisés bi ma bä xipäbi rä hnini gatꞌho nuꞌu̱ yä noya xki mängä Jeoba ꞌne gatꞌho nuꞌu̱ yä mhända, ꞌne gatꞌho rä hnini bi dädi mähye̱gi ꞌne bi ꞌñenä: «Gatꞌho nuꞌu̱ yä noya xä mängä Jeoba di ne gä pe̱fihe». 4 ꞌNepu̱ Moisés bi yꞌofo gatꞌho nuꞌu̱ yä noya xki mängä Jeoba. ꞌNepu̱ rä hyaxꞌä, bi nangi nꞌitꞌho ꞌne bi hyoki nꞌa rä altar ha rä ua rä tꞌo̱ho̱ ꞌne bi hyoki 12 yä columna pa kada nꞌa de nuꞌu̱ 12 yä tribu de Israel. 5 Mꞌe̱fa de geꞌä, bi me̱hni rꞌa yä ñꞌo̱ho̱ mi yä bäsjäꞌi de rä hnini Israel, ꞌne nuꞌu̱ bi tsätꞌi yä ofrenda ꞌne bi hyo yä doro pa bi ofresebi Jeoba ngu yä sacrificio de comunión. 6 ꞌNepu̱ Moisés bi gu̱ mädee de näꞌä ji ꞌne bi xitꞌi ha yä mohi, ꞌne mäde de näꞌä ji, bi hmäꞌtsi ha rä altar. 7 ꞌNepu̱ näꞌä bi gu̱ rä libro de gä kohi ꞌne bi hñeti ntsꞌe̱di pa bi yꞌo̱de gatꞌho rä hnini. ꞌNe nuꞌu̱ bi ꞌñenä: «Gatꞌho näꞌä xä mää Jeoba, nuje di ne gä pe̱fihe, ꞌne nuje ma gä o̱tehe». 8 Hänge Moisés bi gu̱ näꞌä ji ꞌne bi hmäꞌspäbi rä hnini ꞌne bi ꞌñenä: «Gehnä rä ji de näꞌä kohi xä ja Jeoba ko nuꞌähu̱ ja ngu gatꞌho nuꞌu̱ yä noya bi mhää». 9 ꞌNepu̱ Moisés ꞌne Aarón, Nadab ꞌne Abihú, ꞌne 70 de nuꞌu̱ yä ansiano de Israel bi bo̱tsꞌe, 10 ꞌne nuꞌu̱ bi hyandi rä Zi Dada de Israel. ꞌNe habu̱ mi ꞌmai ꞌñenä mi nꞌa rä piso näꞌä xki thoki de gä safiro ꞌne xa mi xä ntꞌaxi ngu mähetsꞌi. 11 ꞌNe Näꞌä hinte bi yꞌo̱tpäbi nuꞌu̱ yä ñꞌo̱ho̱ de Israel, ꞌne nuꞌu̱ bi me̱ꞌtsi nꞌa rä visión habu̱ bi hyandi rä Zi Dada mäjuäni, ꞌne nuꞌu̱ bi ñuni ꞌne bi ntsithe. 12 Nubye̱ Jeoba bi ꞌñembäbi Moisés: «Guä po̱tsꞌe nuua ha rä tꞌo̱ho̱ ꞌne ja dä kopu̱. Nuga ma gä rꞌaꞌi nuya yä nxindo ko rä ley ꞌne rä mhända näꞌä ma gä ofo pa gi pädihu̱ näꞌä ma gi pe̱fihu̱». 13 Hänge Moisés, ꞌne Josué näꞌä rä maxte, bi mꞌai, ꞌne Moisés bi bo̱xä ha näꞌä rä tꞌo̱ho̱ rä Zi Dada mäjuäni. 14 Pe näꞌä xki ꞌñembäbi nuꞌu̱ yä ansiano: «Ja dä to̱bgägiheua asta xkä pengihe. Aarón ꞌne Hur ma dä gohi kongeꞌähu̱. Toꞌo dä me̱ꞌtsi nꞌa rä xuñha dä za dä ma kongehyu̱». 15 ꞌNepu̱, Moisés bi bo̱xä ha rä tꞌo̱ho̱, mientra rä gui mi koꞌmi näꞌä rä tꞌo̱ho̱ꞌä. 16 ꞌNe rä nsunda Jeoba bi sigi bi nja ha rä tꞌo̱ho̱ Sinaí, ꞌne rä gui bi sigi bi goꞌmi näꞌä tꞌo̱ho̱ nuꞌu̱ rꞌato yä pa. ꞌNe näꞌä rä yoto mä pa, Näꞌä bi nzofo Moisés dende mäde de rä gui. 17 ꞌNe yä israelita bi hyandi ge rä nsunda Jeoba mi nheki ngu nꞌa rä däta faspi ha rä ndehe rä tꞌo̱ho̱. 18 ꞌNepu̱ Moisés bi yu̱tꞌi ha mädetho de rä gui ꞌne bi sigi bi bo̱tsꞌe ha rä tꞌo̱ho̱. ꞌNe Moisés bi gohi ha rä tꞌo̱ho̱ po 40 yä pa ꞌne 40 yä xui.