Génesis

12 ꞌNepu̱ Jeoba bi ꞌñembäbi Abrán: «Po̱ni de ri hnini, tsopu̱ nuꞌu̱ ri pariente ꞌne rä ngu ri dada ꞌne gi ma ha näꞌä rä dähni ma gä utꞌäꞌi. 2 De geꞌi ma dä bo̱ni nꞌa rä dängä hnini, ma gä jäpꞌäꞌi ꞌne ma gä japi dä ndägi ri thuhu ꞌne nuꞌi ma gi tso̱ho̱ gi nja nꞌa rä jäpi. 3 Ma gä jäpi nuꞌu̱ toꞌo dä jäpꞌäꞌi, pe nuꞌu̱ toꞌo dä yꞌadi pa geꞌi nꞌa rä tsꞌo thogi ma gä pe̱mpäbi yä ñꞌänthi. ꞌNe po rängeꞌi ma dä njäpi gatꞌho nuꞌu̱ yä familia ꞌmu̱i po gatꞌho rä ngu̱ni rä xiꞌmhai». 4 Hänge Abrán bi gu̱ rä ꞌñuu bi ma ja ngu xki mändabi Jeoba, ꞌne Lot bi ma kongeꞌä. Abrán mi pe̱ꞌtsi 75 yä je̱ya nuꞌmu̱ bi bo̱ni de Harán.