Isaías

11 Nꞌa rä rꞌoho ma dä bo̱ni de rä ndu̱nza Jese, ꞌne de yä yꞌu̱u̱ ma dä bo̱ni nꞌa rä rꞌoho näꞌä xa ma dä uni yä fruta. 2 Ma dä me̱ꞌtsi rä mäkä tsꞌe̱di Jeoba, ꞌne ma dä matsꞌi pa xa dä mbämhñä, pa xa dä nja rä mfeni, pa dä uni yä hogä tsꞌofo ꞌne pa xa dä nja rä tsꞌe̱di, pa xa dä nja rä mfädi ꞌne pa dä me̱ꞌtsi nꞌa rä hogä ntsu po Jeoba. 3 ꞌNe xa ma dä johya po näꞌä rä hogä ntsu di pe̱ꞌtsi po Jeoba. Hingä ma dä juzga ko ho̱nse̱ näꞌä dä hyandi, nixi ma dä juzga ko ho̱nse̱ näꞌä dä yꞌo̱de. 4 Näꞌä ma dä juzga ko rä justisia nuꞌu̱ yä zi hyoya ꞌne ma dä juzga xä ñho nuꞌu̱ yä hojäꞌi de rä xiꞌmhai. Ma dä me̱tꞌi rä xiꞌmhai ko näꞌä rä tsꞌu̱tꞌo de rä ne, ꞌne ma dä hyo nuꞌu̱ yä tsꞌomꞌu̱i jäꞌi ko ho̱nse̱ dä huiki. 6 Rä miñꞌo ꞌne rä tꞌu̱tudi ma dä za dä mꞌu̱i mähye̱gi, ꞌne rä leopardo ma dä mꞌe̱ni mähye̱gi ko nꞌa rä zi tꞌu̱ꞌxi, ꞌne rä tꞌu̱kä doro ꞌne rä zate ꞌne gatꞌho märꞌa yä zuꞌue ma dä za dä mꞌu̱i mähye̱gi; ꞌne nꞌa rä zi tꞌu̱kä bätsi ma dä za dä su nuya yä zuꞌue. 7 Rä baga ꞌne rä osa ma dä ñuni mähye̱gi, ꞌne yä bätsi ma dä mꞌe̱ni mähye̱gi. Rä zate ma dä zi yä tꞌe̱i ja ngu rä doro. 8 Nꞌa rä zi bätsi näꞌä tsu̱tho ma dä za dä ñꞌeni habu̱ ja rä nguu rä cobra; ꞌne nꞌa rä zi bätsi näꞌä ya hingi tsu̱u̱, ma dä za dä yꞌe̱ntꞌi rä yꞌe̱ ha rä nguu nꞌa rä kꞌeñä näꞌä ja rä benenu. 9 Nuꞌu̱ hinte mä ntsꞌomꞌu̱i ma dä yꞌo̱tꞌe, nixi hinte mä dañu ma dä yꞌo̱tpäbi mä mäkä tꞌo̱ho̱; ngeꞌä gatꞌho rä xiꞌmhai, ma dä ñudi ko näꞌä rä mfädi bi ehe de Jeoba, ja ngu nuꞌu̱ yä dehe koꞌmi rä ndehe. 10 ꞌNe näꞌä paꞌä rä yꞌu̱u̱ Jese ma dä ndäta ꞌne ma dä nja ngu nꞌa rä señä pa yä hnini. Yä dähni ma dä joni kongeꞌä pa dä yꞌapäbi yä tsꞌofo, ꞌne näꞌä luga habu̱ ma dä mꞌu̱i, xa xä nsunda.