Isaías

2 ¿Por hanja gi sigi gi jutꞌihu̱ rä bojä mu̱ gi pädihu̱ xä ñho ge hingä geꞌä rä thuhme tꞌaꞌähu̱? ¿Por hanja gi gastahu̱ ri bojähu̱ mu̱ gi kohihu̱ ko rä thuhu ꞌne hingi niñähu̱? Yꞌo̱dehu̱ näꞌä di xiꞌähu̱ ꞌne tsihu̱ näꞌä rä ñhuni xä ñho. Gi nuhmähu̱ ge nubye̱ hää ma gi niñähu̱ ko nuꞌu̱ yä hogä ñhuni. 3 Yꞌo̱dehu̱ ꞌne guä ehu̱. Yꞌo̱dehu̱ pa gi sigi gi tehu̱, ꞌne ma gä ja nꞌa rä kohi kongeꞌähu̱ näꞌä ma dä dura pa nzäntho ja ngu dä prometebi Dabid po näꞌä rä mhäte di pe̱ꞌspäbi, ꞌne ma gä kumpli. 6 Hyonihu̱ rä Zi Dada Jeoba nubye̱ tsa. Maꞌtihu̱ Äjuä nubye̱ ꞌmu̱i getbu̱. 7 Nuꞌu̱ yä bo̱ka jäꞌi, ¡dä hye̱pu̱ nuꞌu̱ yä ꞌñuu xä gu̱u̱! ꞌNe nuꞌu̱ yä tsꞌomꞌu̱i jäꞌi, ¡dä hye̱pu̱ yä tsꞌo mfeni! Dä mengi ko rä Zi Dada Jeoba ꞌne näꞌä ma dä me̱ꞌtsuäbi rä nthekäte. Dä mengi ko mä Zi Dadahu̱, ngeꞌä näꞌä ꞌmu̱i dispuesto dä pumbäbi gatꞌho yä pekado. 8 «Ngeꞌä nuꞌu̱ mä mfeni hingä go ri mfenihu̱, ꞌne nuꞌu̱ ri ꞌñuuhu̱ hingä go mä ꞌñuu», —njabu̱ mängä Jeoba—. 9 Njabu̱ ngu mähetsꞌi mänꞌa xä ñhetsꞌi ke rä xiꞌmhai, njabu̱ ꞌnehe nuꞌu̱ mä ꞌñuu mänꞌa xä ñhetsꞌi ke nuꞌu̱ ri ꞌñuuhu̱, ꞌne nuꞌu̱ mä mfeni ke nuꞌu̱ ri mfenihu̱. 10 Ngeꞌä ja ngu rä yꞌee ꞌne rä xitse̱ tagi dende mähetsꞌi ꞌne pengini mänꞌaki asta mꞌe̱tꞌo pobo rä hai pa japi dä fo̱tsꞌe ꞌne dä te yä planta, ꞌne njabu̱ japi dä nja yä sofo pa dä nja te dä zi näꞌä toꞌo di mpotꞌi, 11 njabu̱ ma dä thogi ko nuꞌu̱ yä noya po̱ni de mä ne. Hingä ma dä mengi kongeki nsinke dä kumpli, sino ke ma dä zo̱ho̱ dä thogi ja ngu di ne, ꞌne gatꞌho ma dä bo̱ni xä ñho ja ngu xtä mää.