3 Juan

5 Zi ku, gi udi ge hixkä he̱gi de gi umbäbi rä mfatsꞌi yä ku mäske hingi pädi toꞌoꞌu̱. 6 Nuꞌu̱ xä ñä xä ñho de geꞌi ꞌne xä mää hängu rä mhäte xkä udi ꞌne yä ku de rä mhuntsꞌi xä da ngue̱nda de geꞌä. Po rä mäte, fatsꞌi nuꞌu̱ yä ku ko näꞌä di japäbi mꞌe̱di pa yä biahe ꞌne pe̱fi ja ngu di ho Äjuä. 7 Ngeꞌä po rä thuhuꞌä nuꞌu̱ bi gu̱ rä ꞌñuu nsinke te bi hñätsꞌi de nuꞌu̱ yä jäꞌi hingi pe̱päbi Äjuä. 8 Hänge nuju̱ di pe̱ꞌtsihu̱ rä obligasio de gä umfu̱ ntsaya ꞌne gä faxu̱ nuꞌu̱ yä kuꞌu̱, pa njabu̱ gä nfatsꞌihu̱ pa dä tꞌungä ntꞌo̱de näꞌä mäjuäni.