Hechos

5 Nubye̱ rä Felipe bi gäi pa rä hnini Samaria ꞌne bi ungä ntꞌo̱de de rä Kristo. 6 Gatꞌho yä jäꞌi xa mi jamäsu näꞌä mi udi rä Felipe; xa mi o̱de ꞌne xa mi handi nuꞌu̱ yä milagro mi o̱tꞌe. 12 Pe nuꞌmu̱ Felipe bi umbäbi ntꞌo̱de nuꞌu̱ yä hogä notisia de rä Tsꞌu̱tꞌhui Äjuä ꞌne de rä thuhu Ñhesukristo, nuꞌu̱ bi gamfribi ꞌne tanto yä ñꞌo̱ho̱ ngu yä ꞌme̱hñä bi nxixtehe. 14 Ora nuꞌu̱ yä apostol mi ꞌmu̱ ha Jerusalén bi bädi ge nuꞌu̱ yä jäꞌi de Samaria xki asepta rä noya Äjuä, nuꞌu̱ bi me̱hni rä apostol Pedro ꞌne rä apostol Juan. 25 Mi uadi bi predika ꞌne bi ꞌñuti yä jäꞌi de rä noya rä Zi Dada Jeoba ha näꞌä luga, nuꞌu̱ bi mengi pa Jerusalén, ꞌne mä ꞌñuu bi thogi ha nuꞌu̱ märꞌa yä tꞌukä hnini de Samaria pa bi ꞌñuti yä jäꞌi nuꞌu̱ yä hogä notisia. 26 Pe rä e̱nxe̱ Jeoba bi zofo Felipe ꞌne bi ꞌñembäbi: «Ñhoki ꞌne gi ma ha näꞌä rä ꞌñuu käi de Jerusalén pa ri ma Gaza». (Näꞌä rä ꞌñuu rꞌani ha yä yꞌotꞌä hai). 27 Hänge Felipe bi ñhoki ꞌne bi ma. Ha rä ꞌñuu bi nthe̱ui nꞌa rä eunuco näꞌä mi mpe̱fi pa rä reina Candace de rä hnini Etiopía. Nunä ñꞌo̱ho̱ mi nkargo dä su gatꞌho näꞌä rä tesoro mi pe̱ꞌtsi rä reina. Näꞌä ñꞌo̱ho̱ xki ma ha Jerusalén pa dä xo̱kämbeni Äjuä, 28 pe ya mi yꞌo rä ꞌñuu pa dä mengi. Mi hudi ha rä carreta ꞌne mi heti ntsꞌe̱di näꞌä xki yꞌofo rä profeta Isaías. 29 Oraꞌä, näꞌä espiritu bi ꞌñembäbi Felipe: «Gi ma ꞌne joni ha nuni rä carreta». 30 Rä Felipe bi nextꞌihi pa bi joni ha rä hyo näꞌä carreta ꞌne bi yꞌo̱de hanja näꞌä eunuco mi heti näꞌä xki yꞌofo rä profeta Isaías, ꞌne näꞌä bi ꞌñembäbi: «¿Gi ntiende näꞌä gi heti?». 31 Näꞌä bi ꞌñenä: «¿Hanja ma dä za gä ntiende mu̱ joꞌo toꞌo dä maxkägi?». ꞌNepu̱ bi bäntebi rä Felipe dä bo̱tsꞌe ha rä carreta ꞌne dä hñuhui.