Prefacio

HA NUNÄ he̱ꞌmi hutsꞌi nuꞌu̱ yä ꞌmede xa mäjuäni bi thogi. Nuꞌu̱ yä ꞌmede bi thäi ha näꞌä rä mfistꞌofo xa mähotho de gatꞌho nuꞌu̱ yä mfistꞌofo ja ha rä Xiꞌmhai, rä Mäkä Tꞌofo. Ha nuyu̱ yä ꞌmede hutsꞌi ha nunä mfistꞌofo mää nuꞌu̱ yä thogi xä neki dende nuꞌmu̱ Äjuä bi mu̱di bi hyoki rä Xiꞌmhai asta nuyu̱ yä pa di ꞌmu̱hu̱. ꞌNehe asta xikägihu̱ näꞌä xä mää Äjuä ge ma dä thogi mꞌe̱fa.

Ha nunä mfistꞌofo ma gi pädi nꞌa tu̱i de nuꞌu̱ yä tꞌo̱tꞌe hutsꞌi ha rä Mäkä Tꞌofo. Ma gi pädi de nuꞌu̱ yä jäꞌi hutsꞌi ha rä Mäkä Tꞌofo ꞌne de näꞌä bi me̱fiꞌu̱. ꞌNehe xikägihu̱ de näꞌä rä hogä humu̱i xä uni Äjuä pa gatꞌho yä jäꞌi: nꞌa rä te pa nzäntho ha rä Xiꞌmhai nuꞌmu̱ xti uädri.

Nunä mfistꞌofo pe̱ꞌtsi hñäto yä ntheke habu̱ bä ꞌñehe nuꞌu̱ 116 yä ꞌmede. Nuꞌmu̱ fu̱di kada nꞌa de nuꞌu̱ yä ntheke, xiꞌi nꞌa tu̱i de nuꞌu̱ yä ꞌmede ma gi hyandi ha näꞌä nthekeꞌä. Nuꞌu̱ yä ꞌmede hutsꞌi ha nunä mfistꞌofo ma gi tini ja ngu bi neki nuꞌu̱ yä thogi mäyaꞌmu̱. Ma dä maxꞌäꞌi pa gi pädi hämꞌu̱ bi neki kada nꞌa de nuꞌu̱ yä thogi.

Hingä ma dä jaꞌi xä ñhei gi hñeti ꞌne gi pädi nuꞌu̱ yä ꞌmede, asta yä bätsi ma dä za dä hñetäse̱ nunä mfistꞌofo. Yä dada ma dä hyandi ge yä zi bätsi xa ma dä ho dä yꞌo̱de ndunthi yä mꞌiki nuya yä ꞌmede. Ma gi dä ngue̱nda ge nunä mfistꞌofo hutsꞌi ndunthi yä tꞌo̱tꞌe pa yä bäsjäꞌi ꞌne pa yä däta jäꞌi.

Kada nꞌa de nuꞌu̱ yä ꞌmede xiꞌi habu̱ ma gi tini ha rä Mäkä Tꞌofo. Di mbitaꞌihe gi hyoni ha ri Mäkä Tꞌofo nuya yä ꞌmede. Ngu gi huadi gi hñeti kada nꞌa de nuꞌu̱ yä ꞌmede, hyandi ꞌnehe nuꞌu̱ yä ntꞌani hutsꞌi mꞌe̱fa de näꞌä Rä ꞌmede 116, ꞌne yꞌo̱tꞌe ntsꞌe̱di pa gi beni yä mpengi nuꞌu̱ yä ntꞌani.