Rä mu̱di ꞌbe̱jri-jähni

¿GI PÄDI te bi me̱fi rä Noe ꞌne rä familia ngu xa bi bo̱ni de rä arka? Näꞌä bi ja nꞌa rä ofrenda o nꞌa rä hogä ntꞌuni pa Äjuä. Hyandi ge geꞌä pe̱fi ha nunä rä kꞌoi. Rä Noe bi uni nuya yä zuꞌue ngu nꞌa rä hogä ntꞌuni pa bi umbäbi njamädi Äjuä ngeꞌä xki su rä Noe ꞌne rä familia pa himbi du ha näꞌä rä däta däyꞌe xki thogi.

¿Gi kamfri ge Jeoba bi ho nunä rä hogä ntꞌuni? Hää, xa bi ho. Hänge bi ja nꞌa rä kohi ko rä Noe ge nunka ma dä yopi dä huati rä xiꞌmhai ko nꞌa rä däta däyꞌe.

Nguntꞌä gatꞌho rä hai bi yꞌotꞌi, ꞌne rä Noe ꞌne rä familia bi bo̱ni de rä arka. Nuyu̱ bi mu̱di nꞌa rä rꞌayꞌo mꞌu̱i. Äjuä bi jäpi nuyu̱ ꞌne bi ꞌñembi: “Pe̱ꞌtsihu̱ ndunthi yä bätsi. Pe̱ꞌtsi gi xuhu̱ asta dä ñuxä rä Xiꞌmhai”.

Pe mꞌe̱fa, nuꞌmu̱ yä jäꞌi xä yꞌo̱de de näꞌä rä däta däyꞌe, ma xä ntsu ge dä nja nꞌa rä däta däyꞌe mänꞌaki. Hänge Äjuä bi uni nꞌa rä tꞌo̱tꞌe pa njabu̱ yä jäꞌi dä beni näꞌä Rä kohi ge nunka ma dä goꞌmi mänꞌaki gatꞌho rä Xiꞌmhai ko rä dehe. ¿Gi pädi te mä tꞌo̱tꞌe bi uni? Nꞌa rä jähni.

Ndunthi yä mꞌiki, rä jähni di nheki ha mähetsꞌi nuꞌmu̱ zo̱ rä Hyadi mꞌe̱fa de nꞌa rä yꞌee. Rä jähni pe̱ꞌtsi xa ndunthi yä kolo xa mähotho. Xi nuꞌi, ¿xkä handi nꞌa rä jähni? ¿Gi handi nuni hutsꞌi ha rä kꞌoi?

Gehnä bi mängä Äjuä: “Di ja nꞌa rä kohi ge nunka ma gä huati mänꞌaki gatꞌho yä jäꞌi ꞌne yä zuꞌue ko nꞌa rä däta däyꞌe. Di hutsꞌi mä jähni ha yä gui. ꞌNe xti nheki rä jähni, ma gä handi ꞌne gä beni nunä mä kohi di ja”.

Hänge, nuꞌmu̱ xki hyandi nꞌa rä jähni, ¿te pe̱ꞌtsi gi beni? Hää, näꞌä rä kohi bi ja Äjuä ge nunka ma dä huati mänꞌaki rä xiꞌmhai ko nꞌa rä däta däyꞌe.