Yä gabaonita bi me̱fi näꞌä xä ñho

NDUNTHI yä hnini de Kanään di ñhoki pa dä ntuhni kontra yä israelita. Huyämu̱i ge ma dä ntäte. Pe nuꞌu̱ yä me Gabaon hingä geꞌä kamfri. Yä gabaonita kamfri ge Äjuä fatsꞌi yä israelita, hänge nuꞌu̱ hingi ne dä ntuhni kontra Äjuä. ¿Gi pädi te bi me̱fi yä gabaonita?

Bi ja ge ngu mi yä mengu yabu̱. Bi hyee rꞌa yä dutu ꞌne bi diꞌti rꞌa yä ze̱xthi nuꞌu̱ ya xki thege. Bi yꞌu̱tꞌi yä yꞌotꞌä thuhme ha rꞌa yä rꞌo̱za nuꞌu̱ xki xigi, ꞌne bi tuti ha yä burru. ꞌNepu̱ bi ma bä nuu rä Josue ꞌne bi ꞌñembi: “Xti ꞌñehe de nꞌa rä hnini xi yabu̱, ngeꞌä xtä o̱dehe de näꞌä ri Zi Dadahu̱ Jeoba. Xtä o̱dehe näꞌä bä ja por geꞌähu̱ ha Ejipto. Hänge nuꞌu̱ mä ndähe bä mändagihe dä hokihe yä ñhuni pa nunä rä biahe xtä jahe, ꞌne bä pe̱nkägihe pa gä xiꞌäꞌihe: «Ge di ꞌmu̱heua pa ri ꞌme̱gogihe. Jurahu̱ ge hingä ma gi ntuhnihu̱ kongekhe». Nuꞌähu̱ dä za gi hyandihu̱ ge xä thege mä dutuhe, ꞌne xä yꞌotꞌi mä thuhmehe, ngeꞌä xti ꞌñehe xi yabu̱”.

Rä Josue ꞌne nuꞌu̱ märꞌa yä ñꞌo̱ho̱ mi gu̱tꞌi rä ꞌñuu, bi gamfri näꞌä bi mängä yä gabaonita. Hänge bi jurabi ge hindä ntunkui. Pe mi thogi hñuu yä pa, bi da ngue̱nda ge yä gabaonita mi ꞌmu̱i getbu̱.

Rä Josue bi ꞌñenä: “¿Por hanja gä mäñhu̱ ge xki ꞌñehehu̱ de yabu̱?”.

Yä gabaonita bi dädi: “Ngeꞌä xtä o̱dehe ge ri Zi Dadahu̱ Jeoba xä ñätꞌähu̱ dä rꞌaꞌähu̱ gatꞌho nunä rä hai Kanään. Hänge dä tsuhe gi hyogähe”. Nubye̱, yä israelita bi kumpli näꞌä xki jurabi yä gabaonita, ꞌne himbi hyo. Pe hää bi yꞌo̱tꞌe yä ꞌme̱go.

Rä ndä de Jerusalen bi nkue̱ ngeꞌä yä gabaonita xki ja nꞌa rä kohi ko rä hnini Israel pa hindä ntuhni. Hänge nubye̱ bi xipi mä goho yä ndä: “Guä ehu̱ ꞌne faxkägihu̱ gä ntuhnihu̱ kontra Gabaon”. Nubye̱, nuꞌu̱ ku̱tꞌa yä ndä bi mfatsꞌi, ꞌne bi ma pa dä ntuhni kontra Gabaon. ¿Bi hogi näꞌä bi me̱fi yä gabaonita nuꞌmu̱ bi ja näꞌä rä kohi ko rä hnini Israel? Ma gä handihu̱.