Dende rä mu̱di ndä ha Israel asta nu’mu̱ bi m’e̱go yä israelita ha Babilonia

Saul geꞌä rä ꞌme̱tꞌo ndä bi mända ha Israel. Pe Jeoba himbi nuu xä ñho Saul, ꞌne bi huahni Dabid pa go bi ndä. Nuju̱ ma gä pädihu̱ ndunthi de Dabid. Nuꞌmu̱ mi bäsjäꞌi, bi ntunkui nꞌa däta jäꞌi mi tꞌembi Goliat. Mꞌe̱fa bi ꞌmatꞌi de näꞌä nda embidioso gä Saul. ꞌNepu̱ Abigail, nꞌa ꞌme̱hñä xi mähotho, himbi hyopi Dabid xä me̱fi nꞌa tsꞌo tꞌo̱tꞌe.

Mꞌe̱fa ma gä pädihu̱ ndunthi de nꞌa rä tꞌu̱ Dabid mi rä thuhu Salomon. Geꞌä bi mända ha Israel mꞌe̱fa de Dabid. Nuꞌu̱ hñuu yä mu̱di ndä ha Israel bi mända 40 yä je̱ya kada nꞌaa. Mꞌe̱fa de bi du Salomon, bi hege näꞌä rä tsꞌu̱tꞌhui mi ja ha rä hnini Israel. Nꞌaa bi tꞌembi rä tsꞌu̱tꞌhui de rä norte, ꞌne näꞌä mänꞌaa bi tꞌembi rä tsꞌu̱tꞌhui de rä sur.

Näꞌä rä tsꞌu̱tꞌhui de nuꞌu̱ 10 yä tꞌu̱kä hnini de rä norte, bi dura 257 yä je̱ya. Mꞌe̱fa, yä me Asiria bi huati nunä rä tsꞌu̱tꞌhui. ꞌNepu̱ bi thogi 133 yä je̱ya, näꞌä rä tsꞌu̱tꞌhui de nuꞌu̱ yoho yä tꞌu̱kä hnini de rä sur, ꞌnehe bi uadi. Yä me Babilonia bi huati nunä rä tsꞌu̱tꞌhui ꞌne bi zixä yä israelita de gä ꞌme̱go. Gatꞌho nuꞌu̱ yä thogi mää ha nunä RÄ NTHEKE 4, bi zitsꞌi 510 yä je̱ya. Ha nuꞌu̱ yä je̱ya, bi thogi ndunthi yä däta tꞌo̱tꞌe.