Nꞌa e̱nxe̱ bi zo̱ni Märia

NUNI ꞌme̱hñä mähotho rä thuhu Märia, mrä israelita ꞌne mrä mengu ha Näsaret. Äjuä mi pädi ge Märia xa mi rä hojäꞌi, hänge bi me̱hni näꞌä rä e̱nxe̱ mi rä thuhu Gabriel pa bi nzofo Märia. ¿Gi pädi te bi xipi Gabriel rä Märia? Ma gä handihu̱.

Gabriel bi ꞌñembäbi Märia: “Gi hatsꞌi, Jeoba xä numäñhoꞌi ꞌne mänꞌa xä jäpäꞌi de gatꞌho märꞌa yä ꞌme̱hñä”. Märia nunka xki hyandi näꞌä jäꞌiꞌä. Bi durämu̱i ngeꞌä himi pädi te mi ne dä mää Gabriel.

Pe Gabriel nguntꞌä bi ꞌñembi: “Ogi tsu Märia, ngeꞌä Jeoba xi di mäꞌi. Hänge ma dä ja nꞌa däta tꞌo̱tꞌe pa nuꞌi. Ma gi pe̱ꞌtsi nꞌa zi ꞌue̱ne ꞌne pe̱ꞌtsi te gi ꞌñembi rä Hesu”.

Gabriel bi sigi bi ꞌñembi: “Näꞌä ma dä me̱ꞌtsi nꞌa däta nsu, ꞌne ma dä tꞌembi rä Tꞌu̱ Äjuä bi ꞌmu̱i mähetsꞌi. ꞌNe Jeoba ma dä hñutsꞌi de gä ndä ja ngu bi ndä Dabid. ¡Pe rä Hesu ma dä ndä pa nzäntho, ꞌne nunka ma dä uadi rä tsꞌu̱tꞌhui!”.

Märia bi ñꞌani: “¿Hanja ma dä njabu̱? Nuga hixtä nthätätho ꞌne hinte mä ñꞌo̱ho̱ di ꞌmu̱ꞌmee, nuꞌmu̱ ¿hanja ma gä pe̱ꞌtsi nꞌa ꞌue̱ne?”.

Gabriel bi dädi: “Rä mäkä tsꞌe̱di Äjuä ma dä ꞌñehe dä gopꞌäꞌi. Hänge näꞌä zi bätsi ma dä tꞌembi rä Tꞌu̱ Äjuä. Beni de näꞌä ri primä Elisabet, yä jäꞌi mi enä ge ya mi rä däta jäꞌi pa xä me̱ꞌtsi yä bätsi. Pe nubye̱, ya ma dä me̱ꞌtsi nꞌa rä ꞌue̱ne ꞌnehe. Ngeꞌä pa Äjuä otho nꞌa rä tꞌo̱tꞌe xä ñhei”.

Märia nguntꞌä bi dädi: “¡Rä ꞌme̱gogi Äjuä! Dä yꞌo̱tꞌe ja ngu xkä xikägi”. ꞌNepu̱ näꞌä e̱nxe̱ bi ma.

Märia bi ntihi bi ma bä nuu Elisabet. Nuꞌmu̱ Elisabet bi yꞌo̱de bi ñä Märia, näꞌä ꞌue̱ne mi o mbo ha rä mu̱i Elisabet bi nsagi ko rä johya. Elisabet bi zo̱päbi rä mäkä tsꞌe̱di Äjuä ꞌne bi ꞌñenä: “Äjuä xä jäpäꞌi de gatꞌho märꞌa yä ꞌme̱hñä”. Märia bi gohi hñu nzänä ko Elisabet, ꞌnepu̱ bi mengi ha Näsaret.

Mi ꞌme̱di tsꞌu̱tho pa xä nthäti Märia ko nꞌa ñꞌo̱ho̱ mi rä thuhu Jose. Pe mi bädi Jose ge Märia mi to̱ꞌmi nꞌa ꞌue̱ne, Jose bi mbeni ya hindä nthätui. Nubye̱ nꞌa rä e̱nxe̱ Äjuä bi ꞌñembi: “Ogi tsu gi nthätui Märia, Äjuä go geꞌä bi umbi näꞌä ꞌue̱ne ma dä me̱ꞌtsi”. Hänge Jose bi nthäti ko Märia, ꞌne mi to̱ꞌmitho näꞌä pa pa dä mꞌu̱i rä Hesu.