Rä Hesu udi ha nꞌa tꞌo̱ho̱

¿GI HANDI habu̱ hudi rä Hesu? Rä Hesu uti gatꞌho nuyu̱ yä jäꞌi ha nunä tꞌo̱ho̱ de rä hnini Galilea. Nuyu̱ yä ñꞌo̱ho̱ hudi ha rä hyo, gehyu̱ yä de̱ni. Rä Hesu bi huahni 12 de geꞌu̱ pa bi yꞌo̱tꞌe yä apostol. Rä Hesu xa mi numäñho nuyu̱ yä apostol. ¿Gi pädi te mi yä thuhu?

Nꞌaa mi tꞌembi Simon Pedro ꞌne rä ku mi rä thuhu Andres. Mänꞌaa mi tꞌembi Santiago ꞌne rä ku mi rä thuhu Juan. Mi ja mänꞌa apostol mi tꞌembi ꞌnehe Santiago, ꞌnehe mänꞌa mi tꞌembi Simon. Yoho yä apostol mi yä thuhu Judas (Judas Iskariote, ꞌne Judas Tadeo). Mä goho yä apostol mi yä thuhu: Felipe, Natanael (mi tꞌembi ꞌnehe Bartolome), Mateo ꞌne Tomas.

Rä Hesu bi bo̱ni de Samäria, ꞌne ngu bi zo̱ni ha Galilea bi mu̱di bi ꞌñudi ge näꞌä tsꞌu̱tꞌhui bi ja ha mähetsꞌi ya mi ꞌmu̱i getbu̱. ¿Gi pädi te mä tsꞌu̱tꞌhuiꞌä? Geꞌä rä tsꞌu̱tꞌhui Äjuä. Rä Hesu go geꞌä rä ndä de näꞌä tsꞌu̱tꞌhuiꞌä, ma dä mända dende mähetsꞌi ꞌne ma dä hä nꞌa hogä mꞌu̱i ha gatꞌho rä Xiꞌmhai. Näꞌä rä tsꞌu̱tꞌhui Äjuä ma dä hyoki de rä Xiꞌmhai nꞌa rä uädri.

Ja ngu gi handi ha rä kꞌoi, rä Hesu bi ꞌñuti yä jäꞌi de rä tsꞌu̱tꞌhui Äjuä, ꞌne bi ꞌñuti ge dä xadi njaua: “Mä Zi Dadaꞌihe gi ꞌmu̱i mähetsꞌi, dä nsunda ri mäkä thuhu. Guä ehe gi ndä, ꞌne dä tꞌo̱tꞌe ri paha o bolunta nuua ha rä Xiꞌmhai ja ngu bi tꞌo̱tꞌe nubu̱ mähetsꞌi”. Ndunthi yä jäꞌi embäbi nunä sadi “Padrenuestro” o “Rä sadi rä Hesu”. ¿Gi pädi nunä sadi?

Rä Hesu ꞌnehe bi ꞌñuti yä jäꞌi hanja dä ntsitsꞌi rꞌa ko märꞌaa. Bi ꞌñembi: “Näꞌä gi nehu̱ dä yꞌo̱tꞌähu̱ yä jäꞌi, yꞌo̱tpäbihu̱ njabu̱ ꞌnehe”. ¿Hänge gi ho nuꞌmu̱ märꞌa di ñhojäꞌi kongeꞌi? ꞌNehe mähyoni gä ñhojäꞌihu̱ ko märꞌaa. ¿Hänge xa ma dä hogi nuꞌmu̱ xti uädri rä Xiꞌmhai ꞌne gatꞌho yä jäꞌi ma dä mädi?