Rä Zi Dada geꞌä nꞌa rä hogä ntsitsꞌi dä za gi pe̱ꞌtsi

Nꞌa rä ñho xi rä dängi mu̱ gi ntsitsꞌiui rä Zi Dada. Rä Zi Dada ma dä xanꞌi hanja gi tini rä johya ꞌne hanja ma dä suꞌi; ma dä ꞌuekꞌäꞌi de nuꞌu̱ yä jamfri hingä mäjuäni ꞌne de nuꞌu̱ yä nzäi di tsꞌoni ri mꞌu̱i. Ma dä yꞌo̱de ri sadi. Ma dä supꞌäꞌi ri mfeni ꞌne ma dä maxꞌi pa hingi turimu̱i (Salmo 71:5; Filipenses 4:6, 7). Rä Zi Dada ma dä maxꞌi nuꞌmu̱ gi thogi yä xuñha (Salmo 18:18). ꞌNehe, rä Zi Dada di ñätꞌäꞌi dä raꞌi nꞌa rä hogä ntꞌuni: ¡nꞌa rä te pa nzäntho! (Romanos 6:23).

Mu̱ gä jonihu̱ ko rä Zi Dada, ma gä jonihu̱ ꞌnehe ko nuꞌu̱ yä ntsitsꞌi. ꞌNehe ma gi ntsitsꞌi ko nuꞌu̱ yä ntsitsꞌi Äjuä. Nuꞌu̱ ma dä zo̱ho̱ dä nja ꞌñenä go ri ku. Ko rä johya ma dä xanꞌi de rä Zi Dada, ma dä maxꞌi ꞌne ma dä nupꞌäꞌi ri mfeni.

Nuju̱ hingä mähye̱gihu̱ ko rä Zi Dada. Nuꞌmu̱ di honihu̱ rä ntsitsꞌi rä Zi Dada mähyoni gä pädihu̱ ge nuju̱ hingä mähye̱gihu̱ kongeꞌä. Näꞌä mänꞌa pe̱ꞌtsi ndunthi yä je̱ya ke nuju̱ ꞌne mänꞌa ja ndunthi rä mfädi ꞌne rä tsꞌe̱di. Näꞌä se̱he̱ꞌä ri ꞌñepi dä Ndä. Hänge rängeꞌä, mu̱ di ne gä ntsitsꞌihu̱ ko rä Zi Dada, pe̱ꞌtsi gä o̱tehu̱ ꞌne gä pe̱fihu̱ näꞌä akägihu̱. Nzäntho go pa mä ñhouise̱hu̱ mu̱ gä o̱tehu̱ rä Zi Dada (Santiago 1:25).