Nuꞌu̱ yä ntsitsꞌi rä Zi Dada geꞌu̱ ma dä mꞌu̱i ha rä Uädri

Ha rä Uädri hindä nja ngu rä xiꞌmhai mäpaya. Ha rä xiꞌmhai xä ñutsꞌi yä xuñha, yä u̱gi ꞌne yä dumu̱i. Rä Zi Dada hingä njabu̱ mi ne. Nꞌa rä pa, rä Zi Dada ma dä hyoki nunä rä Xiꞌmhai pa njabu̱ dä uädri. ¿Hanja ma dä nheki? Ma gä handihu̱ te mää rä Mäkä Tꞌofo.

Yä hogä jäꞌi. Ha rä Uädri ma dä mꞌu̱i se̱he̱ nuꞌu̱ di ntsitsꞌi ko rä Zi Dada. Nuyu̱ ma dä yꞌo̱tꞌe rä ñhojäꞌi, ma dä mfatsꞌi rꞌa ko märꞌaa ꞌne gatꞌho ma dä ñꞌo ha rä ꞌñuu Jeoba (Proverbios 2:21).

Ma dä nja ndunthi rä ñhuni. Ha rä Uädri, hinto ma dä thogi rä thuhu. Rä Mäkä Tꞌofo mää: «Hin[to] ma dä zu̱ rä thuhu [...] nixi rä nduthe» (Apocalipsis 7:16).

Ma dä nja rä hoga ꞌme̱fi ꞌne yä ngu xä ñho. Ha rä Xiꞌmhai de gä uädri, gatꞌho yä jäꞌi ma dä me̱ꞌtsi yä nguu ꞌne nꞌa rä ꞌme̱fi näꞌä ma dä uni rä johya (Isaías 65:21-23).

Hindä nheki yä tuhni ha rä xiꞌmhai. Hinto ma dä ntuhni ha nixi dä nheki yä du. Rä Noya Äjuä mää: «[Äjuä] ma dä japi dä mꞌe̱di yä dängä tuhni» (Salmo 46:8, 9).

Ma dä mꞌe̱di yä ñheni. Rä Mäkä Tꞌofo ñätkägihu̱: «Ninꞌa rä jäꞌi [näꞌä ma dä mꞌu̱i ha rä Uädri] ma dä ꞌñenä: “nuga di hñeni”» (Isaías 33:24). Nuꞌu̱ hingi tsa dä ñꞌo ma dä ñꞌo, nuꞌu̱ yä goda ma dä za dä hyandi, yä gogu ma dä za dä yꞌo̱de ha nuꞌu̱ yä gone ma dä za dä ñä (Isaías 35:5, 6).

Hindä nja rä du, rä u̱gi ha nixi rä dumu̱i. Rä Noya Äjuä mää: «Hindä nja rä du ni yä tsꞌoni ni yä dumu̱i nixi yä u̱gi, ngeꞌä nu yä tꞌo̱tꞌe mi ja mä mꞌe̱tꞌo, nubye̱ ya otho» (Apocalipsis 21:4).

Hindä nheki yä tsꞌomꞌu̱i jäꞌi. Jeoba xä mää: «Nuꞌu̱ yä tsꞌojäꞌi ꞌne nuꞌu̱ yä yohmi ma dä thäki de ha rä xiꞌmhai» (Proverbios 2:22).

Gatꞌho yä jäꞌi ma dä mädi rꞌa ko märꞌaa ꞌne ma dä nja rä tꞌekꞌei. Ma dä nheki nꞌa rä tsꞌu̱tꞌhui xä ñho. Hinto ma dä mꞌe̱go ha nixi to ma dä ñꞌu̱tsa, dä njoꞌo nuꞌu̱ yä jäꞌi kꞌatꞌä bojä. Gatꞌho yä jäꞌi ma dä mfatsꞌi ꞌne gatꞌho ma dä ñꞌo ha rä ꞌñuu Äjuä (Isaías 26:9).