Ma gä ꞌuegehu̱ de nuꞌu̱ yä jamfri hingä mäjuäni

Rä Zithu ꞌne yä u̱xjua hingi ne gä pe̱päbihu̱ rä Zi Dada. Nuꞌu̱ ne dä ꞌueke gatꞌho yä jäꞌi de rä rä Zi Dada. ¿Hanja di japi? Ko nuꞌu̱ yä jamfri hingä mäjuäni (2 Corintios 11:13-15). Nꞌa rä jamfri hingä mäjuäni hingi udi näꞌä mäjuäni de rä Mäkä Tꞌofo. Yä jamfri hingä mäjuäni ꞌñenä nuꞌu̱ yä bojä di nheki ngu xa mäjuäni pe hinte yä muui: se̱he̱ dä za dä uni ndunthi yä xuñha.

Jeoba rä Zi Dada de näꞌä mäjuäni, hindi ho nuꞌu̱ yä jamfri hingä mäjuäni. Mi mꞌu̱kua Ñhesukristo ha rä Xiꞌmhai, rꞌa yä jäꞌi de märꞌa yä jamfri mi ne dä hyo. Nuꞌu̱ mi kamfri ge mi xo̱kämbeni Äjuä ngu ri ꞌñehe. Mi mää: «Nꞌatho näꞌä mä dadahe, go geꞌä Äjuä». Pe ¿te bi mäntho Ñhesukristo? Näꞌä bi dädi: «rä Tsꞌondähi go geꞌä ri dadahu̱» (Juan 8:41, 44). Mäpaya, ndunthi yä jäꞌi kamfri o huyämu̱i ge pe̱päbi Äjuä, pe hingä mäjuäni, nuꞌu̱ pe̱päbi rä Zithu ꞌne yä u̱xjua (1 Corintios 10:20).

Ja ngu nꞌa rä yꞌaza hingi uni yä fruta xä ñho, ha yä jamfri hingä mäjuäni uni yä jäꞌi yä tsꞌomꞌu̱i. Ha rä xiꞌmhai ja ndunthi yä xuñha ko nuꞌu̱ yä tsꞌo tꞌo̱tꞌe pe̱fi yä jäꞌi. Di nheki hanja yä jäꞌi ähui märꞌa yä jäꞌi ha hinxä nthäti, di nheki yä ntsingä medinthäti, yä hyote, yä tuhni, yä mfe ha otho rä tsꞌu̱tꞌhui. Ndunthi nuyu̱ yä jäꞌi pe̱fi nuya yä tsꞌo tꞌo̱tꞌe mää ge pe̱ꞌtsi yä jamfri, pe nuya yä jamfri hingi fatsꞌi dä me̱fi näꞌä xä ñho. Mu̱ hindä paati nuꞌu̱ yä mꞌu̱i xä ntsꞌo, hindä za dä ntsitsꞌiui Äjuä (Mateo 7:17, 18).

Yä jamfri hingä mäjuäni uti yä jäꞌi dä xatuäbi yä kꞌoi de nuꞌu̱ yä zidada hingä mäjuäni. Äjuä xikägihu̱ ge hingä xatuäbihu̱ nuꞌu̱ yä kꞌoi de nuꞌu̱ yä zidada hingä mäjuäni. Geꞌä ri ꞌñepi dä yꞌadi Jeoba. Xi ngu nuꞌäge ¿gi hohmä nꞌa rä jäꞌi dä zofo nzäntho ri kꞌoi pe nuꞌi hingo dri zoꞌi? ¿Ma gi ꞌñembi ri hogä ntsitsꞌi näꞌä rä jäꞌi? Hinä. Jeoba di ho go gä zofohu̱ꞌä hingä nuꞌu̱ yä kꞌoi de yä zidada otho yä te (Éxodo 20:4, 5; 1 Corintios 8:4).

Yä jamfri hingä mäjuäni udi ge yä jäꞌi dä za dä ñhote ha yä dängä tuhni. Ñhesukristo bi mää ge nuꞌu̱ yä ntsitsꞌi rä Zi Dada ma dä mädi nꞌa ngu mänꞌaa. Hingä ma gä häkuäbihu̱ yä te nuꞌu̱ yä jäꞌi di mädihu̱ (Juan 13:35). Nixi ma gä häkuäbihu̱ yä te nuꞌu̱ yä tsꞌomꞌu̱i jäꞌi. Nuꞌmu̱ mi zo̱ho̱ yä nkontra rä Hesu pa dä zitsꞌi, nuꞌu̱ yä de̱näte ma xä ñäni, pe rä Hesu himbi hyopi dä ntuhni (Mateo 26:51, 52).

Yä jamfri hingä mäjuäni udi ge yä tsꞌomꞌu̱i jäꞌi ma dä ma ha rä nidu. Pe rä Mäkä Tꞌofo udi ge rä tsꞌoki dri jutꞌi ko rä du (Romanos 6:23). Jeoba, geꞌä rä Zi Dada de gä mhäte. ¿Gi kamfri ge nunä rä Zi Dada de gä mhäte, pe̱hni yä jäꞌi ha rä nidu? Hinä. Ha rä Uädri ma dä nja nꞌatho rä jamfri, se̱he̱ näꞌä rä jamfri di ho Jeoba (Apocalipsis 15:4). Ma dä mꞌe̱di gatꞌho nuꞌu̱ yä jamfri udi yä nkꞌuamba ehe ha rä Zithu.