¿Hanja mähyoni gä pädihu̱ te mängä rä Mäkä Tꞌofo?

Rä Mäkä Tꞌofo xä tso̱ni ha gatꞌho rä xiꞌmhai, hängutho yä je̱ya xä thogi hinxä nheki mänꞌa rä mfistꞌofo ngu nunä. Xi nuꞌäge ¿xkä handi te hutsꞌi nunä dängä mfistꞌofo? Nuꞌu̱ yä tsꞌofo hutsꞌi ha rä Mäkä Tꞌofo xä matsꞌi ndunthi yä jäꞌi de gatꞌho yä hnini ꞌne yä ñhäki pa dä me̱ꞌtsi nꞌa rä humu̱i o nꞌa rä hogä ndo̱ꞌmi ꞌne xä nupäbi yä mfeni. Ndunthi yä jäꞌi hingi pädi te mängä rä Mäkä Tꞌofo. Pe rꞌaa mäske hingä yä gamfri ne dä bädi te rä be̱ꞌä nunä mfistꞌofo. Mu̱ nuꞌäge gi ne gi pädi ꞌnehe, nunä rä he̱ꞌmi ma dä maxꞌäꞌi gi pädi te hutsꞌi ha rä Mäkä Tꞌofo.

ÄNTE gi fu̱di gi hyandi te mängä rä Mäkä Tꞌofo, dä hogi gi pädi te nguꞌä. Rä Mäkä Tꞌofo pe̱ꞌtsi 66 yä mfistꞌofo. Näꞌä rä mu̱di rä thuhu rä Génesis ꞌne näꞌä rä gätsꞌi rä thuhu rä Apocalipsis (Revelación).

¿Toꞌo yä mfeni nuꞌu̱ hutsꞌi ha rä Mäkä Tꞌofo? Xä ñho gä o̱tꞌehu̱ nunä rä ntꞌani. Bi mꞌu̱ 40 yä jäꞌi nuꞌu̱ bi yꞌofo 66 yä mfistꞌofo. ¿Hängu nje̱ya bi zitsꞌi pa bi tꞌofo? Thogi 1,600 yä je̱ya. Pe xä ñho gä pädihu̱ ge ninꞌa de nuꞌu̱ yä jäꞌi himbi mää ge bi yꞌofo ko yä mfenise̱. Nꞌa de geꞌu̱ bi mää: «Gatꞌho rä Mäkä Tꞌofo, Äjuä go bi ungä rä mfeni pa bi tꞌofo» (2 Timoteo 3:16). Mä nꞌa de geꞌu̱ bi mää: «Ninꞌa xe̱ni de rä Mäkä Tꞌofo himbi yꞌofo de rä mfenise̱ rä jäꞌi. Pe nu [...] yä mꞌe̱hni [...] mi hämpä rä [mäkä] tsꞌe̱di Äjuä ne mi mäñꞌu̱ ngu nuꞌä mi xipä[bi]» (2 Pedro 1:21). Ja ngu di handihu̱, nuꞌu̱ to bi yꞌofo rä Mäkä Tꞌofo, bi mää ge Jeoba, Näꞌä toꞌo xa rä Dängä tsꞌu̱tꞌhui de gatꞌho rä xiꞌmhai go Geꞌä bi uni rä mfeni pa bi thoki, ꞌnehe bi mää ge Jeoba ne ge rä jäꞌi dä bädi toꞌoꞌä.

ꞌNehe mähyoni gä pädihu̱ ge ja nꞌa rä noya näꞌä hutsꞌi ha mäxo̱ge rä Mäkä Tꞌofo. ¿Te mä noyaꞌä? Ge rä Zi Dada ma dä hñutsꞌi nꞌa rä tsꞌu̱tꞌhui ha mähetsꞌi pa dä nsunda rä thuhu, ꞌne pa gatꞌho dä bädi ge se̱he̱ꞌä ri ꞌñepi dä mända rä mexiꞌmhai. Nuꞌäge ma gi hyandi ge geꞌä hutsꞌi ha mäxo̱ge rä Mäkä Tꞌofo, dende rä mfistꞌofo Génesis asta rä mfistꞌofo Apocalipsis.

Yꞌe̱ntꞌä ha ri mfeni näꞌä dä mäñhu̱ nubye̱ ma gi fu̱di gi hyoni näꞌä rä noya dä tinihu̱ ha nunä rä dängä mfistꞌofo rä thuhu rä Mäkä Tꞌofo.

a Ja ndunthi hanja dä za gä pedehu̱ yä je̱ya. Hai de ha yä nxii nunä rä he̱ꞌmi ma gi hyandi nꞌa rä tꞌe̱ni pa gi de̱ni yä ꞌmede yä je̱ya, ma gi hyandini nuya yä letra a.e.c., nuya di signifika antes de rä era común, ꞌnehe ma gi hyandi nuya yä letra e.c., nuya di signifika era común.