Yä tsꞌofo pa gä pe̱ꞌtsihu̱ nꞌa rä dängä jamfri, nꞌa rä mꞌu̱i xä ñho ꞌne rä mhäte

RÄ Santiago ꞌne rä Judas mñä ho̱ku rä Hesu, rä Pedro ꞌne rä Juan gehyu̱ mi yoho de nuꞌu̱ 12 yä apostol. Ko rä mfatsꞌi Äjuä, nuyu̱ goho yä ñꞌo̱ho̱ bi yꞌofo yoto yä karta nuꞌu̱ hutsꞌi ha rä Rꞌayꞌo Testamento, gatꞌho hutsꞌi toꞌo bi yꞌofo. Nuꞌu̱ yä karta bi tꞌofo pa dä matsꞌi nuꞌu̱ yä gamfri dä ñꞌo ha rä ꞌñuu Äjuä ꞌne dä do̱ꞌmi rä Tsꞌu̱tꞌhui Äjuä.

Nꞌa rä jamfri mäjuäni. Nꞌa rä jamfri mäjuäni ma dä jakägihu̱ gä pe̱fihu̱ näꞌä xä ñho. Ja ngu bi yꞌofo rä Santiago «njabu̱ nu mä jamfrihu̱, ꞌmu̱ hindi o̱thu̱ nuꞌä xä ñho, hinte di muui» (Santiago 2:26). Mu̱ di pe̱ꞌtsihu̱ nꞌa rä jamfri rä dängi, ma gä ze̱tihu̱ gatꞌho nuꞌu̱ yä xuñha ma dä ehe. Pe̱ꞌtsi gä kamfrihu̱ ge Äjuä ma dä rꞌakägihu̱ rä mfädi pa dä za gä ju̱hu̱ nꞌa rä ꞌñuu xä ñho. Mu̱ gä ze̱tihu̱ yä xuñha, Jeoba ma dä johya kongekhu̱ ꞌne ma dä rꞌakägihu̱ rä mfatsꞌi (Santiago 1:2-6, 12). Hänge rä Santiago bi mää: «Jonihu̱ ko Äjuä [ꞌne] nuꞌä dä joni kongeꞌähu̱» (Santiago 4:8).

Pa gä ze̱tihu̱ yä tentasio ꞌne nuꞌu̱ yä dängä tsꞌoki, mähyoni gä pe̱ꞌtsihu̱ nꞌa rä jamfri xi rä dängi. Rä Judas mi ꞌmu̱i habu̱ xi mi ja yä tentasio ꞌne yä dängä tsꞌoki, hänge bi uni nunä rä tsꞌofo: «xi gi ñänihu̱ nuꞌä xkä kamfrihu̱» (Judas 3).

Gä pe̱ꞌtsihu̱ nꞌa rä mꞌu̱i xä ntꞌaxi. Jeoba to̱ꞌmi gä pe̱ꞌtsihu̱ gatꞌho mä mꞌu̱ihu̱ xä ntꞌaxi. Rä Pedro bi yꞌofo: «Gi njahu̱bu̱ ꞌnehe, drä ntꞌaxi gatꞌho näꞌä gi yꞌo̱thu̱. Ngetꞌho njabu̱ xi mängä Äjuä ha rä [Mäkä] Tꞌofo: “drä ntꞌaxi ri mꞌu̱ihu̱ nguga [Jeoba] xä ntꞌaxigi”» (1 Pedro 1:15, 16, RN). Pa geꞌä mähyoni gä de̱nduäbihu̱ rä kꞌoi rä Kristo ja ngu bi yꞌofo rä Pedro: «ꞌNe njabu̱ bi utkägihu̱ rä mꞌu̱i [pa] gä te̱ñhu̱» (1 Pedro 2:21). Mäske rꞌabu̱ di sufrihu̱ ngeꞌä di pe̱päbihu̱ yä mhända Äjuä, di pädihu̱ ge mä «mfenihu̱ [xä] ntꞌaxi» (1 Pedro 3:16, 17). Rä apostol Pedro bi mää ge mähyoni gä pe̱ꞌtsihu̱ nꞌa rä mꞌu̱i strä ntꞌaxi ꞌne gä udihu̱ ko näꞌä di pe̱fihu̱ ge mäjuäni di pe̱päbihu̱ Äjuä mientra di to̱ꞌmihu̱ näꞌä Rä pa Äjuä ꞌne näꞌä rä rꞌayꞌo xiꞌmhai habu̱ dä nja «ho̱nse̱ [...] rä hogä mꞌu̱i» (2 Pedro 3:11-13, RN).

Gä udihu̱ rä mhäte. Rä Juan bi yꞌofo «Äjuä [...] rä m[h]äte». Rä apostol Juan bi mää ge Äjuä di mäkägihu̱ ndunthi ngeꞌä bä pe̱hni rä tꞌu̱ «pa bi gutkä mä tsꞌokihu̱». Hänge ¿te mähyoni gä pe̱fihu̱? Rä Juan bi mää: «Mä zi [...] kuꞌihu̱, Äjuä xi bi mädigihu̱ [...], hänge nuju̱ di ꞌñepkägihu̱ gä mädihu̱ nꞌa ngu mänꞌaa» (1 Juan 4:8-11). Dä za gä udihu̱ ge di mädihu̱ märꞌa yä ku nuꞌu̱ yä gamfri mu̱ di umbäbihu̱ ntsaya (3 Juan 5-8).

¿Hanja udi nuꞌu̱ yä gamfri ge di mädi Jeoba? Rä Juan bi dädi nunä rä ntꞌani: «Mu̱ di o̱tuähu̱ yä mhända Äjuä, nuꞌmu̱ xi mäjuäni di mädihu̱ꞌä, ꞌne nu yä mhända Äjuä hingi hei gä o̱tehu̱» (1 Juan 5:3; 2 Juan 6). Toꞌo o̱te yä mhända Äjuä pädi ge dä za dä sigi dä hñäni rä mhäte Äjuä ꞌne dä za dä do̱ꞌmi nꞌa «rä te [...] pa nzäntho» (Judas 21).

(Ehe ha rä Santiago, rä 1 Pedro, rä 2 Pedro, rä 1 Juan, rä 2 Juan, rä 3 Juan ꞌne ha rä Judas.)