¿Ndañꞌä rä bolunta Äjuä?

¡Äjuä ne ge nuju̱ gä pe̱ꞌtsihu̱ nꞌa rä hogä mꞌu̱i ko rä johya ha nꞌa rä uädri nuua ha rä Xiꞌmhai pa nzäntho!

Pe nuꞌi zäi ge gi ñꞌani: “¿Hanja ma dä za gä ꞌmu̱ihu̱ njabu̱?”. Rä Mäkä Tꞌofo mää ge rä Tsꞌu̱tꞌhui Äjuä go geꞌä ma dä me̱päbi rä bolunta Äjuä. Hänge Äjuä ne ge gatꞌho yä jäꞌi dä bädi de nunä Tsꞌu̱tꞌhui ꞌne näꞌä di mbeni dä me̱fi pa gatꞌho yä jäꞌi (Salmo 37:11, 29; Isaías 9:7).

Äjuä honi mä ñhohu̱.

Ja ngu nꞌa rä hogä dada näꞌä di mädi yä bätsi, Äjuä ne ge nuju̱ gä ꞌmu̱hu̱ ko rä johya pa nzäntho (Isaías 48:17, 18). Näꞌä xä mää ge “toꞌo pe̱päbi rä bolunta Äjuä geꞌä ma dä mꞌu̱i pa nzäntho” (1 Juan 2:17).

Äjuä ne ge nuju̱ gä yꞌohu̱ ha yä ꞌñuu.

Rä Mäkä Tꞌofo mää ge Äjuä ne dä «ꞌñutkägihu̱ yä ꞌñuu pa dä za gä yꞌohu̱ ha nuꞌu̱ yä ꞌñuu» (Isaías 2:2, 3). Äjuä xä huahni «nꞌa hnini pa rä thuhu» pa njabu̱ dä fädi ha gatꞌho rä Xiꞌmhai ndañꞌä rä bolunta Äjuä (Hechos 15:14, Traducción del Nuevo Mundo [NM]).

Äjuä ne ge gatꞌho nuꞌu̱ toꞌo di xo̱kämbeni dä ntsitsꞌi nꞌa ngu mänꞌaa.

Näꞌä relijion xa mäjuäni, hindi ꞌueke yä jäꞌi, pe di japi dä ntsitsꞌi ꞌne dä mädi nꞌa ngu mänꞌaa (Juan 13:35). ¿Toꞌo uti mäpaya yä ñꞌo̱ho̱ ꞌne yä ꞌme̱hñä de gatꞌho yä hnini pa dä ntsitsꞌi ꞌne dä me̱päbi Äjuä? Di mbitaꞌihe gi hyoni rä mpengi nunä ntꞌani ha nunä he̱ꞌmi.

PA GI PÄDI MÄ NꞌA TU̱I

Nxadi rä Mäkä Tꞌofo ko nuje. ¿Ya gi nxadi rä Mäkä Tꞌofo ko nꞌa testigo rä Jeoba? Mu̱ tobe hinä, ¿gi hohmä ge nꞌa testigo rä Jeoba dä ze̱njuaꞌi pa dä nxadi rä Mäkä Tꞌofo kongeꞌi? Hinte mä bojä ma gi jutꞌi po geꞌä. Mu̱ gi pe̱fi njabu̱ geꞌä mänꞌa ma dä maxꞌäꞌi pa dä za gi kuatꞌi Äjuä.

Hñäni rꞌa yä mfistꞌofo ꞌne hinte mä bojä ma gi jutꞌi. Nuꞌi dä za gi ma ha nꞌa rä Ngu de gä Mhuntsꞌi o dä za gi ñäui nꞌa de nuꞌu̱ yä testigo rä Jeoba pa gi yꞌapäbi nꞌa mfistꞌofo näꞌä dä maxꞌäꞌi gi pädi näꞌä hutsꞌi ha rä Mäkä Tꞌofo. Dä za gi yꞌadi ha näꞌä idioma go gi ne.

Pädi toꞌogihe ha Internet. Hyandi näꞌä luga pe̱ꞌtsi yä testigo rä Jeoba ha Internet www.jw.org/ote. Ja gekua ma dä za gi hñeti rä Mäkä Tꞌofo. Ma dä za gi hñeti o gi hñäꞌmpäbi yä kꞌoi ndunthi de nuꞌu̱ yä mfistꞌofo di hokihe ha thogi 750 yä idioma.