Hanja dä za gä uñhu̱ ntꞌo̱de mänꞌa xä ñho: ꞌÑudi hanja di tꞌo̱tꞌe nꞌa rä estudio ko rä mfistꞌofo Enseña

Por hanja xa mähyoni. Ndunthi yä jäꞌi, hindi ntiende te di ne gä xipäbihu̱ nuꞌmu̱ di mbitabihu̱ dä hñäni nꞌa rä estudio o nꞌa rä ntꞌudi näꞌä hinte di njutꞌi. Ndunthi yä jäꞌi huyämu̱i ge pe̱ꞌtsi te dä nxadi ndunthi yä ora o ge pe̱ꞌtsi te dä Ntestigo. Hänge dä hogi ge hingä ho̱nse̱ gä mbitabihu̱ dä hñäni nꞌa estudio, mänꞌa dä hogi gä utihu̱ hanja di tꞌo̱tꞌe nꞌa estudio. Ko ho̱nse̱ nꞌa hängu minuto ꞌne ha rä goxthi rä nguu, dä za gä utihu̱ ge xa mähotho ꞌne hinxä ñhei nꞌa rä estudio o ntꞌudi de rä Mäkä Tꞌofo habu̱ ma dä bädi ndunthi.

Te dä za gä pe̱fihu̱:

Mꞌe̱fa de gi ze̱njua nꞌa rä jäꞌi ꞌne gi xipäbi toꞌoꞌi, yꞌambäbi mu̱ tupäbi rä mu̱i dä bädi te ma dä thogi kongeꞌä ꞌne rä familia pa xudi ndämäni.
Xipäbi ge hingä ho̱nse̱ꞌä di mbeni njabu̱, ge ndunthi yä jäꞌi tuyämu̱i ꞌnehe, ꞌne ꞌñuti te hutsꞌi ha rä indise de rä mfistꞌofo Enseña. Xipäbi ge nunä he̱ꞌmi hingi hei toꞌo dä nxadi ꞌne udi hanja rä Mäkä Tꞌofo mää te ma dä thogi xudi ndämäni ꞌne thädi märꞌa yä ntꞌani. ꞌNepu̱ yꞌambäbi ndañꞌä näꞌä temä dä hohmä dä bädi.
Umbäbi nꞌa rä mfistꞌofo ꞌne ꞌñuti habu̱ hutsꞌi näꞌä temä bi huahni. Xipäbi ge nuꞌu̱ yä ntꞌani hutsꞌi ha rä mu̱di rä ntheke, ma dä dimbäbi yä mpengi ha nuꞌu̱ yä parrafo pe̱ꞌtsi.
Yꞌambäbi mu̱ dä hohmä dä maxꞌäꞌi dä hñeti näꞌä rä mu̱di rä parrafo. Xti uadi, hñeti rä ntꞌani ehe pa näꞌä parrafoꞌä ꞌne fatsꞌi dä dimbäbi rä mpengi. Huahni nꞌa de nuꞌu̱ yä testo huxpu̱ pa dä hyandi ge geꞌä mää rä Mäkä Tꞌofo. ꞌÑuti hanja xkä märka ha ri mfistꞌofo yä mpengi pa kada nꞌa de nuꞌu̱ yä ntꞌani brä ꞌñehe.
Thogi ha mä nꞌa rä parrafo, pe nubye̱ yꞌapäbi näꞌä jäꞌi dä dädi näꞌä ntꞌani ja ngu bi ntiende.
Umbäbi njamädi po näꞌä bi dädi, ꞌne yꞌambäbi te mä pa ꞌne te mä ora dä za gi pengi pa gi sigihu̱ ko nuꞌu̱ märꞌa yä parrafo di ꞌme̱di.
Mu̱ dä za, ku̱tꞌi ha jw.org/oto ꞌne ꞌñuti rä bideo ¿Hanja di tꞌo̱tꞌe nꞌa rä ntꞌudi de rä Mäkä Tꞌofo?

Pe̱fi nuya yä tsꞌofo nunä zänä:

Xatuäbi rä Zi Dada Jeoba pa dä maxꞌäꞌi gi tini nꞌa ri rꞌayꞌo estudio (Filip. 2:13).
Kada gi po̱ni gi ungä ntꞌo̱de, yꞌo̱tꞌe ntsꞌe̱di po gi ꞌñuti nꞌa rä jäꞌi hanja di tꞌo̱tꞌe nꞌa rä estudio ko rä mfistꞌofo Enseña, o gi ꞌñudi rä bideo ¿Hanja di tꞌo̱tꞌe nꞌa rä ntꞌudi de rä Mäkä Tꞌofo?