Usa rä foyeto Introducción a la Palabra de Dios pa gi fu̱di gi ñäui yä jäꞌi
1. ¿Te mä rꞌayꞌo mfatsꞌi di pe̱ꞌtsihu̱ pa gä uñhu̱ ntꞌo̱de?
1 Ha rä däta mhuntsꞌi regional bi tꞌakägihu̱ rä foyeto Introducción a la Palabra de Dios. Zäi ge ya dä dahu̱ ngue̱nda ge nunä foyeto ri hñätsꞌi rä mfistꞌofo Razonamiento. Hutsꞌi yä ntꞌani ꞌne yä mpengi xä thäi de rä Mäkä Tꞌofo, ꞌne dä za dä maxkägihu̱ pa gä fu̱dihu̱ gä ñäꞌmehu̱ yä jäꞌi nuꞌmu̱ di uñhu̱ ntꞌo̱de. ¿Hanja dä za gä usahu̱ nunä foyeto pa gä hokihu̱ yä presentasion?
2. ¿Hanja dä za gä usahu̱ rä foyeto Introducción a la Palabra de Dios nuꞌmu̱ di uñhu̱ ntꞌo̱de?
2 Dä za gi usa rä ntꞌani 8 ꞌne gi ꞌñenä: «Xtä da ngue̱nda ge ndunthi yä zi jäꞌi xä yꞌo̱tꞌe nunä ntꞌani: ¿Pe̱ꞌtsi Äjuä rä tsꞌoki de nuꞌu̱ sufrimiento thogi yä jäꞌi? [Mu̱ dä za, ꞌñuti näꞌä ntꞌani hutsꞌi ha rä foyeto, rä nxii 14.] ¿Xi nuꞌi te gi mbeni? [Hyopi dä dädi näꞌä jäꞌi.] Rä Mäkä Tꞌofo thädi nunä ntꞌani». Dä za gi hñeti de rä Mäkä Tꞌofo rꞌa de nuꞌu̱ yä testo huxpu̱. Mu̱ dä yꞌo̱de xä ñho näꞌä jäꞌi, dä za gi ꞌñuti nuꞌu̱ 20 yä ntꞌani ehe ha rä nxii 1 de nunä foyeto, ꞌne gi ꞌñembäbi: «De nuya yä ntꞌani huxkua, ¿te mä ntꞌani gi hohmä gi timbäbi rä mpengi?». Xipäbi ge mä nꞌa rä pa, ma gi pengi pa gi thädi näꞌä ntꞌani bi huahni. ꞌNehe, dä za gi umbäbi nꞌa de nuꞌu̱ yä he̱ꞌmi di usahu̱ pa di unihu̱ yä estudio, habu̱ ma dä dini mä nꞌa tu̱i rä imformasion de näꞌä temä gä ñähu̱.
3. ¿Hanja dä za gä usahu̱ rä foyeto Introducción a la Palabra de Dios pa gä umbäbihu̱ ntꞌo̱de nuꞌu̱ yä jäꞌi kamfri Äjuä pe hingi kamfri rä Mäkä Tꞌofo?
3 Nuꞌu̱ yä ntꞌani 4, ꞌne 13 asta 17 dä za gä usahu̱ nuꞌmu̱ di umbäbihu̱ ntꞌo̱de nuꞌu̱ yä jäꞌi kamfri Äjuä pe hingi kamfri rä Mäkä Tꞌofo. Mu̱ ma gi usa rä ntꞌani 17, dä za gi ꞌñembäbi: «Di ze̱njuahe gatꞌho yä besinu, ¿xkä da ngue̱nda ge ngu ri thogi yä pa, yä familia thogi po ndunthi yä xuñha?». Hyopi dä dädi näꞌä jäꞌi, ꞌne nsinke gi ju̱ki rä Mäkä Tꞌofo xipäbi näꞌä hutsꞌi ha Efesios 5:33 ꞌne ꞌñembi: «Ndunthi yä medinthäti xä jamäsu nunä tsꞌofo de “dä umbäbi rä tꞌekꞌei yä däme”. [Mu̱ gi ñäui nꞌa rä ꞌme̱hñä, dä za gi no̱ni nuꞌu̱ yä noya hutsꞌi ha Efesios 5:28.] ¿Gi kamfri ge dä za dä matsꞌi yä medinthäti nunä tsꞌofo?».
4. ¿Te dä za gi xipäbi xki huadi gi ñäui nꞌa rä jäꞌi näꞌä kamfri Äjuä pe hingi kamfri rä Mäkä Tꞌofo?
4 Xki huadi gi ñäui näꞌä jäꞌi, xipäbi ge ma gi pengi mä nꞌa rä pa, pa gi sigi gi ñähu̱ de näꞌä temä. Xki pengi, dä za gi xipi märꞌa de nuꞌu̱ yä tsꞌofo hutsꞌi ha näꞌä rä ntꞌani gä usa. Ya go gi hyandi hämꞌu̱ dä za gi xipäbi ge nuꞌu̱ yä tsꞌofo xkä ꞌñuti, ehe ha rä Mäkä Tꞌofo. Ko näꞌä ya gä xipäbi, hyandi te di mbenibye̱ näꞌä jäꞌi de rä Mäkä Tꞌofo, ꞌne umbäbi nꞌa rä he̱ꞌmi näꞌä gi handi ge ma dä ho dä hñeti. (Hyandi Nuestro Ministerio del Reino de diciembre de 2013, yä nxii 3-6.)