Rä karta de rä Cuerpo Gobernante

Zi kuhu̱ ꞌne zi njuhu̱:

«Di aphe Äjuä po geꞌähu̱ ꞌne nzäntho di umfe njamädiꞌä po gatꞌhoꞌihu̱. Nuꞌmu̱ di aphe Äjuä mä Dadahu̱, nzäntho di beñhe ri jamfrihu̱ ꞌne ri ꞌme̱fihu̱ de gä mhäte, ꞌne di beñhe de gatꞌho nuꞌä gi tse̱tꞌhu̱, ngeꞌä gi pe̱ꞌtsuäbihu̱ rä humu̱i mä zi Hmuuhu̱ rä Ñhesukristo bi ꞌmu̱i ha rä thandi Äjuä mä Dadahu̱» (1 Tes. 1:2, 3). Nuya yä noya, ¡geꞌä xa di tsahe ha mä korasohe ꞌne di umbäbihe njamädi Jeoba po geꞌähu̱ ꞌne po näꞌä ri ꞌme̱fi gi jahu̱!

Näꞌä je̱ya bi thogi bi nheki «ri jamfrihu̱», ꞌne «ri mhätehu̱» ha näꞌä ꞌme̱fi gä jahu̱ po rä Tsꞌu̱tꞌhui Äjuä. Ndunthi de geꞌähu̱, xkä honihu̱ hanja dä za gi mpe̱fihu̱ mä nꞌa tu̱i pa gi uñhu̱ ntꞌo̱de. Rꞌaa xä ma ha mä nꞌa rä luga o asta ha mä nꞌa rä dähni habu̱ bi ja mꞌe̱di rä mfatsꞌi pa dä tꞌungä ntꞌo̱de. Märꞌaa, xä dini rä johya de dä ungä ntꞌo̱de habu̱ thogi ndunthi yä jäꞌi. Ndunthi yä ku, bi mpe̱fi de gä prekursor ausiliar ha näꞌä zänä bi dagi rä Fenäte de rä du rä Hesu, ha näꞌä zänä bi ntso̱nte rä biajante ha rä mhuntsꞌi, o ha näꞌä campaña bi nja näꞌä zänä Agosto. Di felisitaꞌihe ngeꞌä gi pe̱päbihu̱ rä Zi Dada Jeoba ko ngatꞌho ri korasohu̱, ri tehu̱ ꞌne ri tsꞌe̱dihu̱ mäske rꞌa nꞌañꞌo nuꞌu̱ yä xuñha gi thogihu̱ (Col. 3:23, 24). ¡Di umbäbihe ndunthi njamädi rä Zi Dada Jeoba po näꞌä «ri jamfrihu̱» gi udihu̱ nuꞌmu̱ gi uñhu̱ ntꞌo̱de!

ꞌNehe di jamädihe ndunthi po näꞌä «ri mhätehu̱» gi udihu̱ pa di thoki nuꞌu̱ yä ngu di ja mꞌe̱di pa dä so̱kämbeni Jeoba. Ngeꞌä ngu ri thogi yä pa, rä hnini Äjuä yꞌo ri xu ndunthi (Is. 60:22). Ho̱nse̱ näꞌä je̱ya bi thogi bi zo̱te 8.201.545 yä publikador, ꞌne bi tꞌuni 9.499.933 yä estudio tatꞌä zänä. Po geꞌä, di ja mꞌe̱di dä thoki märꞌa yä Ngu de gä Mhuntsꞌi, ꞌne xä thandi ge mähyoni dä thoki mänꞌa yä däta ndunthi de nuꞌu̱ yä ngu Betel. Pe hingä ho̱nse̱ꞌä, ha ndunthi yä dähni de rä Xiꞌmhai, ꞌnehe di ja mꞌe̱di dä thoki yä ofisinä de gä traducción, pa njabu̱ dä za dä mꞌu̱i ꞌne dä mpe̱fi yä traduktor ha nuꞌu̱ yä luga habu̱ bi fädi nuꞌu̱ yä idioma ñä.

Ko näꞌä ya dä pädihu̱, ¿te dä za gä pe̱fihu̱ pa gä mfaxtehu̱ dä thoki nuya yä ꞌme̱fi? ¿Dä za gä uni de mä tiempohu̱ ꞌne mä tsꞌe̱dihu̱ pa gä mfaxtehu̱ de gä boluntario pa dä thoki nuꞌu̱ yä ꞌme̱fi? Mäske hingä gatꞌho dä za gä mfaxtehu̱ de gä boluntario, hää di pe̱ꞌtsihu̱ rä däta nsu de gä unihu̱ de nuꞌu̱ yä “ñho di pe̱ꞌtsihu̱” (Prov. 3:9, 10). Mäyaꞌmu̱, mi yꞌo̱de yä israelita ge ma xä thoki rä tabernäkulo, nuꞌu̱ bi mu̱di bi uni de nuꞌu̱ yä ñho mi pe̱ꞌtsi ꞌne asta bi bongi ꞌne bi tꞌembäbi ge ya hinxä hñätsꞌi märꞌaa (Éx. 36:5-7). Nunä hogä kꞌoi nupkägihu̱ mä mfenihu̱ ꞌne mä korasohu̱ pa gä pe̱fihu̱ njabu̱ ꞌnehe. Zi kuhu̱, näꞌä «ri mhätehu̱» gi udihu̱ pa dä thoki nuya yä ꞌme̱fi, ¡geꞌä mä nꞌa rä raso di pe̱ꞌtsihe pa gä umbäbihe njamädi rä Zi Dada Jeoba!

Pe di ne gä xiꞌähe ge mänꞌa xa di johyahe nuꞌmu̱ di hanthe ge hingi he̱gihu̱ de gi pe̱phu̱ rä Zi Dada Jeoba mäske gi thohu̱ yä xuñha. Ja ngu nuꞌu̱ yä zi ku bi ꞌmu̱i ha Corea del Sur. Dende rä je̱ya 1950 nuꞌu̱ yä zi ku yä bäsjäꞌi bi ꞌmu̱hni, xä tꞌe̱ntꞌi fadi ngeꞌä hinxä ne xä yu̱tꞌi dä ja yä servicio militar pa dä tꞌuti dä ntuhni ngu de gä soldado. Rꞌa de gehyu̱ xä tꞌe̱ntꞌi fadi po rꞌa yä zänä, pe märꞌaa, po ndunthi yä je̱ya. Pe nuꞌu̱ yä zi ku, xä ze̱ti gatꞌho näꞌä xä tꞌo̱tꞌpäbi ꞌne hinxä hye̱gi rä Zi Dada Jeoba. ¡Nuꞌmu̱ di handihe hängu xä ze̱ti, japi dä te mä jamfrihe!

ꞌNehe, ha rä dähni de Eritrea, hñuu mä kuhu̱ bi o fadi ya o̱tꞌe thogi de nꞌate nje̱ya. ꞌNehe rꞌa yä nju xä tꞌe̱ntꞌä fadi ko zi yä bätsi. Xä tꞌo̱tꞌe gatꞌho näꞌä xä za pa drä ju̱ki de rä fadi, pe yä tsꞌu̱tꞌhui de gehni hinxä hyopi dä bo̱ni nuyu̱ mä kuhu̱. Mäske nuꞌu̱ mä kuhu̱ xä tꞌo̱tꞌpäbi nuya yä ntsꞌomꞌu̱i, nuꞌu̱ xä ze̱ti ꞌne hinxä ꞌuengi de rä ꞌñuu Jeoba. Nuje nzäntho di xatuäbihe rä Zi Dada Jeoba po nuyu̱ yä ku (Rom. 1:8, 9).

Ndunthi de geꞌähu̱ hingi sufrihu̱ ha nꞌa rä fadi ngu nuꞌu̱ yä ku, pe hää di pädihe ge gi ze̱tihu̱ yä ñheni, yä xuñha ngeꞌä ri familiahu̱, ri däme o ri ꞌme̱hñähu̱ hingyä gamfri. Rꞌa de geꞌähu̱ ya gyä zi däta jäꞌihu̱ ꞌne gi thogihu̱ yä xuñha, o rꞌabu̱ gi thogihu̱ märꞌa yä dumu̱i o yä u̱gi nuꞌu̱ ho̱nse̱ꞌihu̱ gi pädihu̱. Mäske njabu̱, ¡hixkä he̱gihu̱ rä Zi Dada Jeoba ꞌne gi sigi gi pe̱päbihu̱! (Sant. 1:12.) ¡Xi xä ñho näꞌä gi pe̱fihu̱! Nuꞌmu̱ di handihe hanja xkä ze̱tihu̱, ¡hängu rä johya di rꞌakägihe ꞌne di umbäbihe njamädi rä Zi Dada Jeoba po geꞌähu̱!

Hää, «ri jamfrihu̱», «ri mhätehu̱», ꞌne gatꞌho näꞌä gi ze̱tihu̱ ꞌne gi pe̱fihu̱, gehya yä däta raso di pe̱ꞌtsihe pa gä «umbäbih[e] njamädi Jeoba, ngeꞌä näꞌä rä hojäꞌi» (Sal. 106:1). Nuje di mäꞌäꞌihe ndunthi, ꞌne di xatuäbihe rä Zi Dada Jeoba pa dä maxꞌäꞌihu̱ gi sigi gi ze̱tihu̱, pa dä jäpꞌäꞌihu̱ ꞌne njabu̱ dä za gi pe̱päbihu̱ pa nzäntho.

Ri kuhu̱,

Rä Cuerpo Gobernante de yä Testigo rä Jeoba