Ma gä usahu̱ rä foyeto Yä hogä noya

1. ¿Hanja rä foyeto Yä hogä noya nꞌañꞌo de nuꞌu̱ märꞌa mä he̱ꞌmihu̱?

¹ Ja ngu dä handihu̱ ha Mä Mäkä ꞌMe̱fihu̱ pa Äjuä de rä julio, rä foyeto Äjuä pe̱ꞌtsi rꞌa yä hogä noya pa nuꞌi, geꞌä mä nꞌa rä erramienta di pe̱ꞌtsihu̱ pa gä udihu̱. Ha nunä he̱ꞌmi, hingi ehe te mää nuꞌu̱ yä testo, pa njabu̱ näꞌä jäꞌi toꞌo di nxadi ko nunä foyeto, dä hñeti nuꞌu̱ yä testo de rä Mäkä Tꞌofo. Ndunthi de nuꞌu̱ mä he̱ꞌmihu̱, xä thoki pa dä nxadise̱ yä jäꞌi. Pe hingi njabu̱ ko rä foyeto Yä hogä noya, ngeꞌä pa toꞌo dä ntiende nuꞌu̱ yä ntꞌudi, di ja mꞌe̱di nꞌa rä xahnäte. Hänge ora gi uni nunä foyeto, yꞌo̱tꞌe ntsꞌe̱di po gi fu̱di nꞌa rä estudio pa njabu̱ näꞌä jäꞌi dä hyandi ge xa mähotho dä ntiende nuꞌu̱ yä ntꞌudi ko rä Mäkä Tꞌofo (Mat. 13:44).

2. ¿Hanja dä za gi usa rä foyeto Yä hogä noya pa gi fu̱di nꞌa rä estudio?

² Fu̱di nꞌa rä estudio dende ri mu̱di. Dä za gi ꞌñenä: «Ndunthi yä jäꞌi tuyämu̱i ngeꞌä hingi pädi te ma dä thogi pa xudi ndämäni. ¿Gi kamfri ge nꞌa rä pa ma dä uadi nuꞌu̱ yä tsꞌo tꞌo̱tꞌe di handihu̱ mäpaya? [Hyopi dä dädi näꞌä jäꞌi.] Rä Mäkä Tꞌofo rꞌakägihu̱ nꞌa rä hogä humu̱i. Hyandi rꞌa de nuꞌu̱ yä ntꞌani thädi rä Mäkä Tꞌofo». Umbäbi näꞌä jäꞌi nꞌa rä foyeto, ꞌne mbitabi dä huahni nꞌa de nuꞌu̱ yä ntꞌani hutsꞌi ha rä gäxä nxii. ꞌNepu̱, xoki näꞌä ntheke bi huahni, ꞌne nxadihu̱ näꞌä mu̱di parrafo. O dende rä mu̱di, nuꞌi dä za gi ñhoki ko nꞌa rä ntꞌani näꞌä gi pädi ge rä mpengi ehe ha nunä he̱ꞌmi, ꞌnepu̱ ꞌñuti hanja ko rä mfatsꞌi nunä foyeto, dä za dä dimbäbi rä mpengi ha rä Mäkä Tꞌofo. ꞌNehe, mu̱ ha jw.org ja nꞌa rä bideo näꞌä ñä de näꞌä ntꞌani o temä, dä za gi yꞌe̱ntsꞌi pa dä hyandi.

3. Mää hanja gi usa rä foyeto Yä hogä noya pa gi uni nꞌa rä estudio.

³ Nuꞌmu̱ ya gi uni nꞌa rä estudio. 1) Hñeti näꞌä ntꞌani ehe de gä mboi, pa njabu̱ näꞌä jäꞌi gi xahni dä da ngue̱nda te mä ntꞌudi ma dä bädi. 2) Hñeti rä parrafo. 3) Hñeti nuꞌu̱ yä testo ehe ha rä ngätsꞌi de rä parrafo. 4) Mu̱ ha nꞌa rä ntꞌani pe̱ꞌtsi thogi de nꞌa rä parrafo, pe̱fi nuꞌu̱ yä tsꞌofo 2 ꞌne 3 pa kada nꞌa rä parrafo. Mu̱ ha jw.org ja nꞌa rä bideo näꞌä ñä de näꞌä ntꞌani o temä, dä za gi yꞌe̱ntsꞌi pa dä hyandi. 5) Pa ri uadi, yꞌapäbi näꞌä ri estudio dä dädi näꞌä ntꞌani, pa njabu̱ gi hyandi mu̱ bi hää bi ntiende näꞌä ntꞌudi.

4. ¿Te ma dä maxꞌäꞌi pa gi pädi gi usa xä ñho rä foyeto Yä hogä noya?

⁴ Pädi gi usa xä ñho nunä foyeto. Yꞌo̱tꞌe ntsꞌe̱di po gi usa habu̱ dä za. Änte de gi ma gi uni nꞌa rä estudio, mꞌe̱tꞌo mbeni hanja dä za gi usa nuꞌu̱ yä testo ehe ha yä parrafo pa gi fatsꞌi näꞌä jäꞌi gi xahni (Prov. 15:28; Hech. 17:2, 3). Mu̱ gi jamäsu nuya yä tsꞌofo uni nunä artikulo, ma gi pädi gi usa xä ñho nunä foyeto ꞌne ma gi ho gi usa pa gi ꞌñuti yä jäꞌi näꞌä xa mäjuäni de Äjuä.