¿Xkä o̱tꞌe nunä ntꞌani?

◼ ¿Hämꞌu̱ dä hogi gi hye̱gi de gi uni nꞌa rä estudio?

Mꞌu̱ nꞌa de nuꞌu̱ ri estudio hindi ja yä mpadi ha rä mꞌu̱i, ko rä tꞌekꞌei dä hogi gi xipäbi ge ya hingä ma gi nxadi kongeꞌä (Mat. 10:11). Ñꞌanise̱: ¿Di kumpli ko näꞌä ora xtä hutsꞌihe pa gä nxadihe? ¿Di ñhoki ko näꞌä ntheke ma gä nxadihe? ¿Ya xä ntini ha nꞌa rä mhuntsꞌi? ¿Uti märꞌa de näꞌä xä bädi? ¿O̱tꞌe yä mpadi ha rä mꞌu̱i ja ngu udi rä Mäkä Tꞌofo? Kada nꞌa rä jäꞌi di nꞌañꞌo de märꞌaa, hänge mähyoni gi yꞌo̱tꞌe ngue̱nda hängu nje̱ya pe̱ꞌtsi näꞌä jäꞌi gi uti ꞌne mu̱ di ntiende nguntꞌä nuꞌu̱ yä ntꞌudi. Pe mu̱ gi handi ge mänꞌa xä ñho ya hingi umbäbi rä estudio, xipäbi ge mu̱ ꞌme̱fa dä ne dä ñhani nꞌa rä estudio, dä za dä yꞌadi mänꞌaki (1 Tim. 2:4).