Fatsꞌi nuꞌu̱ yä ku xä hye̱gi de dä me̱päbi Jeoba

Näꞌä märte 11 de rä abril ndunthi de nuꞌu̱ yä ku xä hye̱gi de dä me̱päbi Jeoba ma dä ntini ha rä Fenäte de rä du rä Hesu. Mäske nuyu̱ bi mu̱di dä ñꞌo xä ñho ha rä ꞌñuu Jeoba, pe mꞌe̱fa bi hye̱gi de bi me̱päbi; rꞌaa po nuꞌu̱ yä raso no̱ni ha rä foyeto Jehová desea que vuelva (Heb 12:1). Pa rä Zi Dada Jeoba tobe xa ja ndunthi rä muui nuꞌu̱ yä ku, ngeꞌä näꞌä bi daꞌiꞌu̱ ko näꞌä rä ji rä Tꞌu̱ (Hch 20:28; 1Pe 1:18, 19). ¿Hanja dä za gä fatsꞌihu̱ pa dä mengi ha rä hnini Äjuä?

Ja ngu nꞌa rä hogä mayꞌo honi nuꞌu̱ yä zi de̱ti xä mꞌe̱di, njabu̱ ꞌnehe yä ansiano de rä mhuntsꞌi honi hanja dä dini ꞌne dä matsꞌi nuꞌu̱ yä ku xä hye̱gi de dä me̱päbi Jeoba (Lu 15:4-7). ¡Hängu rä mhäte udi rä Zi Dada Jeoba po geꞌu̱! (Jer 23:3, 4.) Pe hingä ho̱nse̱ yä ansiano dä za dä matsꞌi nuya yä ku. Gatꞌho dä za gä mfaxtehu̱. Mu̱ nuju̱ ꞌnehe gä ñhojäꞌihu̱ kongeꞌu̱ ꞌne gä fatsꞌihu̱, ma gä japhu̱ dä johya rä Zi Dada Jeoba ꞌne näꞌä ma dä jäpi näꞌä ma gä pe̱fihu̱ po gä fatsꞌihu̱ nuꞌu̱ yä ku (Pr 19:17; Hch 20:35). Hänge dä hogi gi mbeni toꞌo dä za gi fatsꞌi ꞌne ogi hopi dä thogi ndunthi rä tiempo.

HYANDIHU̱ RÄ BIDEO FATSꞌI NUꞌU̱ YÄ KU XÄ HYE̱GI DE DÄ ME̱PÄBI JEOBA. MꞌE̱FA THÄDIHU̱ NUYA YÄ NTꞌANI:

• ¿Te bi me̱fi Abbey nuꞌmu̱ bi bädi nꞌa rä nju näꞌä xki hye̱gi de dä me̱päbi Jeoba?

• Mu̱ di benihu̱ gä fatsꞌihu̱ nꞌa rä ku näꞌä xä hye̱gi de dä me̱päbi Jeoba, ¿por hanja di debe gä ñähu̱ mꞌe̱tꞌo ko yä ansiano?

• ¿Te bi me̱fi Abbey änte de dä ma dä nuu mänꞌaki Laura?

• ¿Hanja bi ꞌñudi Abbey rä pasensia, rä mhäte ꞌne ge himbi zabi de dä hyoni hanja dä matsꞌi Laura?

• ¿Te dä za gä pädihu̱ de näꞌä rä ꞌmede bi usa rä Hesu ha Lucas 15:8-10?

• ¿Te mä jäpi bi nheki po gatꞌho näꞌä bi me̱fi yä ku pa bi matsꞌi Laura?