¿Hängu rä komfiansa gi pe̱ꞌspäbi nuꞌu̱ yä promesa Jeoba?

Josué ꞌne Salomón bi hyandi xä ñho hanja Jeoba xki kumpli nuꞌu̱ yä promesa (Jos 23:14; 1Re 8:56). Näꞌä bi mää nuꞌu̱ yoho yä ꞌme̱go Äjuä, japi dä ze̱di mä jamfrihu̱ ꞌnehe (2Co 13:1; Tit 1:2).

¿Hanja bi kumpli Jeoba yä promesa ha yä pa Josué? Pa gi pädi, hyandi ko ri familia rä pelikula «Gatꞌho näꞌä xä mää nixi nꞌa rä noya hinxä mꞌe̱di». Mꞌe̱fa, thädihu̱ nuya yä ntꞌani: 1) ¿Hanja bi ꞌñudi Rahab ge mi pe̱ꞌspäbi rä jamfri Jeoba ꞌne hanja dä za gä de̱mbäbihu̱ rä ejemplo? (Heb 11:31; Snt 2:24-26.) 2) Acán bi yꞌo̱tꞌe yä tsꞌoki mäske mi pädi ge Jeoba ma xä nkue̱, ¿te utkägihu̱ näꞌä bi thogiꞌä? 3) Mäske yä me Gabaón xa mi pädi dä ntuhni, ¿por hanja bi hyatꞌi Josué pa bi ja nꞌa rä kohi kongeꞌu̱? 4) ¿Hanja bi kumpli Jeoba rä promesa nuꞌmu̱ ku̱tꞌa yä rey yä amorreo bi amenäsa Israel? (Jos 10:5-14.) 5) ¿Hanja xä maxꞌäꞌi Jeoba ngeꞌä gi hutsꞌi mꞌe̱tꞌo ha ri mꞌu̱i rä Tsꞌu̱tꞌhui ꞌne rä justisia? (Mt 6:33.)

Ora di mbenihu̱ näꞌä xä me̱fi Jeoba, näꞌä pe̱fi mäpaya ꞌne näꞌä ma dä me̱fi xudi ndämäni, mä komfiansahu̱ po nuꞌu̱ yä promesa mänꞌa di te (Ro 8:31, 32).